BJP-in hma la duh loah sorkar puh
BJP, Mizoram Pradesh chuan, Ministry of Home Affairs joint secretary Dilip Kumar-a'n August 8, 2017-ah Mizoram Chief Secretary hnenah lehkha thawnin, Mizorama hnam dang dan loa pêm lutte zawng chhuak a, an rama thawn haw turin a hriattir tih an tarlang a; mahse, Mizoram sorkar tun thlengin hma a la la lo niin an sawi.
Nimina Mizoram BJP thuchhuah chuan, India rama dan loa pêm lutte an rama thawnkir vek chu Narendra Modi kaihhruai sorkar laipui duh dan leh thil tum pui ber pakhat a ni tih an sawi a, "Chutih mek laia Congress sorkarin hnam dang, dan loa Mizorama lo pém lutte dap chhuak tura ke a pên duh miah lo hi mak kan ti a, ram hmangaihtu tih tur niah kan ngai lo," an ti.
BJP chuan, Mizorama Congress sorkarin dan loa Mizorama lut hnam dangte dap chhuah a, an rama thawn kîr an nih leh theih nana hma a la duh miah lo chu politics ball atan hman a tum nge, a hmang mek tawh zawk tih an sawt a; tun hnuah chuan politics tenawm khel tawh lo a, ram hmasawnna chiah ngaihtuah tawh turin CM Lal Thanhawla an phût a ni.