Minister-in home enkawltute a kâwm

Social Welfare minister PC Lalthanliana chuan nimin khan a pisaah Mizorama home leh centre hrang hrang enkawltute a ko khawm a; mumal leh awmze nei zawka home-te enkawla kalpui dan tur a sawipui.

PC Lalthanliana chuan, ruihhlo ngaite enkawlna kawngah Mizoram sorkarin tun aia ṭha zawk leh chang­tlung zawka kalpui a tum tih sawiin, centre leh home-te tan minimum standard zawm tur siam a ngaih tur thu leh, home leh centre-te chu accreditation pek tum a nih thu a sawi a; sorkarin kalpui a duh dan hrang hrangte a tarlang.

Social Welfare Minister hian home leh centre enkawltute chu an harsatna neihte a zâwt a; home/centre enkawltute'n an harsatna an sawite chu sorkarin a puih theih dan ang anga puih a inhuam thu a sawi.

Home/centre-te kalphung ṭha leh changkang zawka kalpuina turah Chief Minister leh Finance Minister-te an inhawng tih sawiin PC Lalthanliana chuan, awmze nei leh mumal zawka kal chhoh theih ngei a beisei thu a sawi bawk.

Sawihonaah hian mimal, pawl leh kohhran enkawl home leh centre hrang hranga an aiawhte an tel a ni.