Mihring leh ran tana ei tlak loh Buhfai chhia MPC-in pawi an ti

MPC party chuan thuchhuah siamin, RTI Act hmanga an zawhna Supply department-in a chhannaah, sorkarin mipui­a ration buhfai a sem tur, Mizorama Supply center hrang hranga a chhêk khâwl mek leh retailer-te'n an sem mek­te chu mihring leh ran tan pawha ei tlak loh khawpa chhia a nih thu chhanna an dawng tih an tarlang a, "A vanduaithlak kan ti tak zet," an ti.

MPC chuan, Darlawn S­upply Centre leh Sakawr­dai SDC-a buhfai chhia (sub-standard) mipui hnen­a sem tlak loh chhêk khâwl a ni chu supplier-te nen hnungthak inhiah tawnna a awm ngeia an rin thu an sawi a; mihring leh ran tan pawha ei tlak loh tia medical doctor leh veterinary doctor-te'n a finfiah tawhte chu mipui hnenah sem chhuak tawh lo a, a rang thei ang bera tirîral nghal turin sorkar an phût.

Mizoram sorkar chu mipui ni tin mamawh ngaihthahah puhin MPC chuan, "Ṭhahnemngai leh tlawmngaia hna­tlang kawng siam, 'Elsên hnatlang' tia CM Pu Lal Thanhawla’n a vuahte hi khua leh tuite a ngaihnêpzia leh tlawmngaihna a hriatthiam phak lohzia a tihlannaah kan ngai," an ti.

MPC party chuan, CM Lal Thanhawla kaihhruai Congress sorkarin ram leh mipuite mamawh a pe lo a, mamawh loh zawk kawngpui chhia, buhfai chhia, Chakma foreigner-te a pe thung niin an sawi bawk.