BTS-in sipai an zawm dawn

K-pop boy band BTS chuan an ram, South Korea danin a phut angin member zawng zawngte chuan mandatory military service hi an zawm vek dawn tih an agency chuan nimin khan a puang.

An member zinga upa ber, kum 29 mi Jin chuan sipaia an ṭan hun pangngai ang chu hman zawh a duh a, vantlang hmuhah kum hnih dawn a inlan thei dawn lo tihna a ni.

BTS hian kum 2013 khan an hla hmasa ber 'No More Dream' chu an tichhuak a, heta ṭang hian an hla thothang ṭha leh ṭhalaite tichak zawnga campaign an kalpui ṭhin avangin khawvel hriat hlawh an ni chho ṭan a ni.

Jin chuan sipaia a ṭan hun chu kumin October thla tawp lamah tihkhawtlai a dil dawn tih member pasarih awmna band-a management group HYBE thuchhuah chuan a tarlang. An ruahman danin, member-te hian mandatory military duty hi zawm vek an tum a ni, an ti.

"Company leh BTS member-te chuan service an hman zawh hun, kum 2025 bawr velah pawl anga inzawmkhawm leh an tum," tiin BTS enkawltu HYBE hnuaia awm, Bighit Music chuan a hranpaa an thuchhuahah an tarlang ve bawk.

South Korea-a mipa, pianphunga rualban loh tiam lohin, kum 18 aṭanga 28 inkarte chu sipaiah hian thla 18 aṭanga 21 thleng ṭang vek tura thupek an ni. Category ṭhenkhatah erawh ngaihhnathiamna siamsak emaw hun rei lote chhung ṭang tura koh te emaw pawh an awm a, chungte chu Olympics leh Asian Games-a pakhatna, competition lian thama classical musician leh dancer lawmman pakhatna dawngtute an ni. Hetihlai hian, lawmaker ṭhenkhatte chuan BTS hi hriatthiamna siamsaka awltir turin an ngensak ve mek bawk a ni.

BTS chuan kumin June thla khan pawl anga rimawi lama an hmachhawpte chawlhsan lailawk leh solo project lam buaipui an tum thu an chhuah a, mi tam tak chuan an band hi kehchhe mai tur ang ten an sawi hman hial. Mah se, Inrinni liam ta khan Busan khawpuiah World Expo 2030 neih tur puala an ram tana campaign-na ni pahin free concert-ah an inlan leh a ni.