Khiangte Construction Ṭhazual Gospel ; A hmasa berah Faktu ft. Maruati 'I lam kan lo hawi'

Khiangte Construc-tion Ṭhazual Gospel chart-ah Faktu ft Maruati 'I lam kan lo hawi' chu pakhatna a ni. Seraphic Choir 'Van kawngkhar hawng la' chu pahnihna niin, C. Lalremruata 'Ka kal zel dawn' chu pathumna a ni.

Faktu ft Maruati 'I lam kan lo hawi' hi Lalrindiki phuah niin, tune hi C. Lalzarmawia siam a ni. Music mawi tak hi Ephraim kutchhuak niin recording chu HC Recording-ah tih a ni a, video simple leh mawi tak hi BS Pictures kutchhuak a ni thung. A hla a mawi piah lamah Maruati leh Faktu te'n nung tak leh mawi takin an sa chhuak a, tunlaia hmeichhe gospel singer zinga huhang ngahber pawl Maruati leh mipa gospel singer ṭha rual awmna Faktu hian mipui mit leh beng a tlung hle a, chart-ah roreltu an nihna hian a rawn nemnghet a ni.

Pahnihna leh pathumna
Seraphic Choir hla thar 'Van kawngkhar hawng la' chu pahnihna a ni a, thla khat vel liam taa an tihchhuah hian pahnihna dinhmun an rawn luah nghal a ni. Pathumnaah hian C. Lalremruata hla 'Ka kal zel dawn' a awm bawk .

Chart-a hla dang te
Palinaah hian Maruati vek rawn lang lehin, a hla thar 'Ka pel ang' chu a rawn hlangkai a, Mizo Idol star Lancy ft Pisgah 'Min kai ang che' chu pangana an ni.

Chart top 10-ah hian Sawmtea Chhangte, R. Lal-rinmawii (Arini), Zomuani Pachuau, Sangtei Hmar leh Gracy VL Pachuau-te pawh an lang.