Handler-i'n Puerto Rico tan sum thawh hnem

American comedian Chelsea Handler-i chuan Hurricane Maria-in a nuai avanga Puerto Rico-a chhiat tawkte ṭanpuina turin dollar 1,000,000 a thawh.

Handler hian tun hnai khan 'Netflix show' a chhuahsan tur thu a lo puang tawh a, hemi hnu lawk hian Puerto Rico mipuite ṭanpuina tur sum a pek thu hi a puang zui a ni. Puerto Rico-in chhiatna rapthlak tak a tuar chu pawi a tih thu sawiin, a tawrhpui tak zet thu a sawi. Vanduaina tawkte chu indawm kun mai lo a, hmalam thlir chunga huaisen taka harsatna hmachhawn turin a fuih bawk.

Puerto Rico mipuite tan hian khawthlang celebrity-te an che chhuak nasa hle a, donation lut pawh a ṭhahnem tawh hle a ni. Handler bakah hian, Jennifer Lopez, Alex Rodriguez, Jay-Z, Daddy Yankee leh midang eng emawzatin ṭanpuina hi an pe tawh a ni.

Thlipui na tak Hurricane Maria hian September 20 khan US-a thliarkar pakhat, Puerto Rico hi a nuai a, chhiatna rapthlak tak a thlen a ni. Hmun hrang hrangah building chhia, inkal pawhna mumal lo leh power supply awm lo avangin buina a thleng a, mi maktaduai 3.4 velin harsatna an tawk a ni. Nitin mamawh tui leh eitur lakkhawm a harsa a, an harsatna tawh hi a namai lo hle.

Mithiamte chuan Puerto Rico nuaitu thlipui nat zawng hi, a tehnaah category 4 lai a nih thu sawiin, kum eng emaw zat chhunga chiatna an tawh rapthlak ber zinga mi a nih thu an sawi.