Demi leh Selena inkar ṭha leh tawh
Demi Lovato leh Selena Gomez-te chu hun rei tak chhung an inhmuhthiam loh hnuah tun hnai khan "InStyle Awards"-ah an inlan dun a, Red Carpet-ah thla an la dun a ni.
"InStyle Awards' hi October 23 khan Getty Center, Los Angeles-ah buatsaih a ni a, Demi leh Selena-te chu mipui hmuhah a inlan dun a ni.
An ni pahnih hi naupangte an nih lai aṭangin ṭhian ṭha tak an ni a, an hming lemah pawh 'Delena' tih an ni ṭhin. Kum naupangte ni chungin Barney & Friends leh Disney Channel-ahte an lo inlan dun tawh bawk. Mahse tun hnai kum hnih kalta vel aṭang khan an inhmu thiam lo a, an inkar boruak pawh a chhe viau a ni awm e. Lovato hian Gomez hi Twitter lamah pawh a block hial nia tarlan a ni.
Mahse tunah chuan an inkar a ṭha leh tawh a, an thlalakte pawh social media lamah an post leh chaui chuai tawh.
Selena Gomez hian "It Ain't Me" a tihchhuah hnuah a reh deuh vang vang a, Marshmello nena thawk duninin tun hnai khan "Wolves" an tlangzarh leh tawh. Demi Lovato pawh hian a documentary thar ber 'Demi Lovato: Simply Complicated' chu tun hnai khan a tlangzarh a ni.