Delhi sorkarin Diwali vanga boruak bawlhhlawh a buaipui

India ram hmun hrang hranga Diwali lawm a nih hnuah, khawvel huap pawha khawpuite boruak bawlhhlawh ber zinga mi Delhi a buai. Diwali lawm dawnah halpuah leh halmawi hal khap mah se, Mizote anga thil ṭha zirtir awlsam tak an ni ve lem lo a niang, halpuah leh halmawi hal nasat a nih avanga boruak chhia tihziaawmna turin sorkar laipuiah Delhi sorkar chuan ngenna a thlen.

Thawhṭanni khan Delhi sorkar chuan sorkar laipuia Union Environ­ment Minister, Harsh Vardhan hnenah lehkha thawnin, Delhi boruak chhia, boruaka thil nawi lêng nasa lutuk tihziaawm a nih theih nan, Ministry of Civil Aviation hnenah helicopter emaw thlawhtheihna emaw hmanga tui phuh chhuak tura ngen turin rawtna a thlen.

Delhi Environment Minister Imran Hussain chuan, "Delhi boruak thianghlim lo chho zel kan thlir hian, Ministry of Civil Aviation hnenah, Delhi khaw boruak chunga boruak nawi leng vel leia a tlak theih nan helicopter emaw thlawhtheihna hmanga tui phuh chhuak tura min ngensak turin ka ngen che a ni," tiin a ziak. Hemi atana senso ngai pawh Delhi sorkar hian sên a inhuam thu ziah lan a ni bawk.

Graded Response Action Plan (GRAP) chuan nikuma Diwali zawh hnu lawk aṭanga Delhi khawpui boruak chhe lehzual ang kha a thlen lohna turin kumin hian hma a la viau nachungin a sawt tak tak rih lo a nih hmel. Nikum khan, Diwali zawh hnu aṭang khan Delhi khawpui boruak chu a bawlhhlawh nasa zual hle a, chanchinbu tam tak chuan 'Gas Chamber' tiin an sawi hial a ni. Mihring tana hlauhawm chin an tih let riat zetin nikum khan a bawlhhlawh a ni.

Khawpui boruak bawlh­hlawh tihziaawm a nih theih nana hma lak nan kum 2008 aṭang khan air ambience fund an tih chu an siam a, Diesel litre khat zelah boruak bawlhhlawh tihfai nana hma lak nan siki (pawisa 25) zel lak a ni. He pawisa lak zat tling khawm hi nikum thleng khan cheng vaibelchhe 240 zet a tling tawh. Tuna Delhi khaw boruak tihfai nana thlawhtheihna hmanga tui phuhna hi pawisa sen a ngai a nih chuan air ambience fund aṭanga pek tura ruahman a ni.

GRAP hian a hma aṭangin kawng hrang hrangin boruak bawlhhlawh a ziaawm nan hma a la a, rawtna tam tak a chhawp chhuak bawk. Badarpur power plant pawh October 15 aṭang khan thlasik chhung chu hnathawk lo tura tih a ni a, July 2018 aṭang khian tihtawpsak an tum nghe nghe.