George Clooney-a'n Africa tan sum thawh hnem

Hollywood star George Cloo­ney chuan Africa khaw­mualpuia tualchhung indona avanga harsatna tawkte tan, Clooney Foundation for Justice kal­tlangin ṭanpuina sum $mtd 1 a pe.

Actor George Clooney chuan Africa khawmualpuia ram hrang hrangten tualchhung buaina an hmachhawn mek chu pawi a tih thu sawiin, remna leh muanna a awm theihna tura chak zawka hma lak a duh thu a sawi. "Tualchhunga indona thleng avang hian mi tam takin ei leh in tur an tla chham a, thih mai hmabak mi tam tak an awm a ni. Kan mihring puite chunga tawrhna thleng mek hi a rapthkak tak zet a, ṭanpui an mamawh hle a ni" a ti.

Clooney hian harsatna tawkte ṭanpuina tur hian, 'Make Criminals Pay' campaign a kalpui a, mihringte dikna chanvo rahbeha awm mek chu tihtawp tumin hma a la a ni. Charity lama thawh hlawk tak Clooney hian Africa khawmualpuia ram hrang hrangte chu an ram mipuite himna ngai pawimawh tura chahin, an damkhaw chhuahna tura hma la turin a ngen a ni.

Kum 56 mi Clooney hian kum 2015 khan human rights activist John Prendergast puihnain 'Sentry' a din a, mihringte dikna chanvo humhalh turin kawng hrang hrangin hma a la a ni. Clooney Foundation for Justice kaltlangin ram hrang hrangah ṭanpuina a lo semchhuak tawh bawk. 'Sentry' hian hmun hrang hrang aṭangin donation a dawng ve bawk a, hengte hi mamawhna hmun a piangah an sem chhuak ṭhin. Tun hnai khan hmun hrang hrang aṭangin ṭanpuin $mtd 3.45 an dawng a ni.

Sentry co-founder John Prendergast chuan khawvelah remna leh muanna a awm zel theihna tura hma lakte, ram hrang hranga tual chhung buaina titawp tura hmalak te, mihring dikna chanvo humhalh tur leh, retheihna avanga nunna chan an awm lohna tura hma lak chu an tum ber a nih thu a sawi ve bawk.

Africa khawmualpuiah hian Egypt, Sudan, Libya, Tunisia, Algeria, Morocco, Somalia, Ugan­da, Mali, Mauritania, Niger, Nigeria, Western Sahara, Democratic Republic of Congo leh Chad-ahte tualchhung buina a thleng mek a, mipuite tawrhna a nasa hle nia tarlan a ni.