Selena-i'n JB-a nen boruak ṭha neih a duh

Selena Gomez chuan a bialpa hlui Justin Bieber nen boruak ṭha tak neih a duh thu a sawi. Hei hian an pahnih inkara sawi awm neuh neuh chu mi tam tak chuan a rawn nem nghetah an ngai a, an inkar a fuh chho leh niin an ngai.

Kum 25 mi Selena hian tun hnai khan kidney transplant a ti a, tunah chuan a dam ṭha leh tawh viau a ni. A nungchang pawh a ṭhat phah viau a ni awm a, Biak In lamahte pawh a hmel hmuh tur a awm an ti!

Selena hi tun hnai khan Californai-ah JB-a nena an inzui hi hmuh a ni a, an chanchin hian ngaihven a hlawh nghal hle. Hetiang a nih mek lai hian an ni pahnih hi an inbe ṭha leh tawh viau niin an sawi a, Biak In-ahte pawh an inkhawm dun niin an sawi leh zel. An ṭhian hnaite chuan inkawp leh turin an nawr niin an tarlang bawk a, enge thleng zel dawn hriat a ni rih lo.

Hetih lai hian Selena-i leh Canadian singer The Weeknd-te chu an inzui mek niin an sawi a, ṭhenna biahthu lam reng an sawi lo. Mahse The Weeknd hian Selena leh JB-a inhniam hnaih leh chungchang hi a ngaisak vak lo niin an tarlang. The Weeknd hi model chhe-lo Bella Hadid nen sawi zawm a ni ve mek bawk.