Bob Dylan hla thar 'False Prophet' Thla lehah album thar

Music legend, khawvel huapa hla lar tak tak phuahtu Bob Dylan chuan kumin chhunga a pathumna turin hla thar 'False Prophet' a tichhuak leh ta a, thla leh lamah hi chuan album thar tihchhuah a tum bawk.

March-ah khan minute 17 laia sei hla 'Murder Most Foul' a tichhuak a,  Rock Digital Song Sales chart-ah No.1 nihpuiin Billboard chart-ah a vawi khatna turin No.1 a nihpui bawk. April khan hla thar 'I Contain Multitudes' a tihchhuah leh hnuah nimin khan 'False Prophet' hi a tichhuak leh a ni.

'False Prophet' hla hi slow blues a ni a, Dylan fan-te tan chuan ngaihven ran chi a ni ngei ang.

Bob Dylan hian June 19 hian album thar 'Rough And Rowdy Ways' a tlangzarh dawn a, kumin chhunga a hla tihchhuah tawh pathumte pawh hi a album tharah hian a dah vek dawn a ni.

Dylan hian hla thar hlang awmna album a tlangzarh hnuhnun ber chu kum 2012 daih tawh kha a ni a, Shadows in the Night, Fallen Angels, leh Triplicate-te chu hemi hnu hian tlangzarh leh tho mah se heng hi chu collection a ni thung.

'Rough And Rowdy Ways' hi a studio album 39-na tur a ni dawn a, studio album 39 tlangzarh thei hi an tam lo hle ang. Album a tlangzarh hmasak ber aṭangin kum 57 lai a liam tawh a a ni. A album thar turah hian track 10 a awm dawn a, a CD version-ah chuan 'Murder Most Foul' hi disc hranah minute 17 laia sei a nih avangin a dah dawn.

Kum 2016 khan Bob Dylan hian 'Nobel Prize in Literature' a dawng hial a, kum 78-a upa ni tawh mah se album thar tlangzarh a la tum ruh hle a ni.