Praise On Top 50 inelna neih chhunzawm zel

Synfo leh Central KTP thawk dunina a buatsaih 'Praise on 2022' top 50 round neih mek a ni a; mipui ngaihhlut a hlawh chho hle.

Top 50 round hi Thawhlehni zan aṭang khan Republic Veng Presbyterian Kohhran Hall-ah neih ṭan a ni a, zan khatnaah hian mi 19 an in lan. Zaninah chhunzawm leh a ni dawn a, top 50 round zan hnuhnung ber chu Zirtawpni zanah hian neiin, hemi zan vek hian top 20-a in hlangkaite hming puan chhuah nghal a ni ang.

Top 50-ah hian music track nen an zai tawh a, an zai thiam tlang tawhin intihsiakna neihna hmun, Republic Veng Kohhran Hall chhung thawm pawh a ṭha thei hle.

Elimination round-a in lan mi 379 zinga a ṭha zual mi 50 thlan chhuahah hian a tam zawk chu Aizawl khawpui chhung branch mite an ni a, mi 14-te erawh Aizawl pawn branch aṭanga telte an ni.

Praise on 2022 intihsiakna hi Live-in Hruaina Eng channel leh Synfo Youtube channel-ah te pek chhuah ṭhin a ni.

Top 50 aṭanga a ṭha 20 thlanchhuahte chuan October 27-29, 2022-ah Chaltlang Presbyterian Kohhran Hall-ah intihsiakna an nei leh ang.