Zaninah Taylor Swift album thar 'Midnights'

Taylor Swift chuan kum 2017 khan a Reputation track “New Year’s Day,” ah “I want your midnights.” tiin a lo sa tawh a, kum 2022 a lo inherchhuah meuh chuan album thar 'Midnights' tih chu zanin hian a tlangzarh dawn. Hripui len vanglai, kum 2020-a original studio album, Evermore a tihchhuah aṭanga kum hnih dawn a liam hnuah Taylor Swift chuan album thar a tichhuak leh dawn ta a ni.

Taylor Swift hian rimawi khawvela kum 16 hun a hman chhungin album pakua a tichhuak tawh a, a music genre-te chu country aṭanga pop, alternative aṭanga folk lam hawi thlengin a lo thlak danglam tawh.

Swift chuan a album thar chungchang chu a hringnun bung hrang hranga zan 13 mu thei loa a awm laia a thil tawnte an ni tih sawiin, hlauhna leh mumang duhawm, kan vahvelnaa harsatna ka hmachhawnnate an ni," a ti.

A album hnuhnung pahnih Evermore leh Folklore-te kha novel behchhana phuah an ni a, tuna a album tharah erawh a mimal hringnun tarlanna a ni dawn nia tarlan a ni.

Joe Alwyn pual hla phuah awmna
Swift chuan a opening track 'Lavender Haze' chu a ngaihzawng, lemchanthiam Joe Alwyn nen kum ruk chhung an inzuina aṭanga lo piang niin a sawi. A hla pakhat 'Anti-Hero' chu a chhungrila inrintawk lohna awm ṭhin phochhuahna a nih thu Instagram kaltlangin a sawi.

A album-a music-te hi eng thlukin nge a siam dawn tih chu fans-te hriat chak a ni. Swift hian dan naranin album pahnih danah a music genre hi a thlak ṭhin avangin Midnights pawh hi hripui len hmaa a lo tihchhuah ṭhin indie-folk lam chu beisei chi a ni lo maithei.

Record siamtu a ni thei
Swift album 10-na Midnights hian Billboard 200-ah pakhatna dinhmun a hauh leh thei a nih chuan a album tihchhuah zawng zawng pakhatna nihpui vek thei dawn a, Barbra Streisand record chu nihrualin hmeichhe artist zinga hetiang dinhmun thleng thei pahnihna a ni dawn a ni. Kum 1956-a chart mumal tak kalpui a nih hnuah The Beatles chuan No. 1 album 19 nei tawhin a chung berah an awm a, rapper Jay Z chuan 14 nei tawhin pahnihnaah a awm. Swift hian Midnights album hi a hlawhtlinpui chuan Streisand, Bruce Springsteen leh Drake-te chu nihrualin pathumnaah a inhlangkai dawn a ni.

Midnight album-a hla awm te:
1. “Lavender Haze”
2. “Maroon”
3. “Anti-Hero”
4. “Snow on the Beach” (ft. Lana Del Rey)
5. “You’re on Your Own, Kid”
6. “Midnight Rain”
7. “Question…?”
8. “Vigilante Shit”
9. “Bejeweled”
10. “Labyrinth”
11. “Karma”
12. “Sweet Nothing”
13. “Mastermind”