X Factor-ah Simon Cowell a inlan thei lo

Simon Cowell chu a taksa lamah harsatna a tawh vangin X Factor show-ah a inlan thei lo.

X Factor live show hi nimin Pathiannni khan neih a ni a, Simon a inlan loh avang hian a entu mipui pawh an hrilh hai hle. Host Dermot O'Leary chuan, "Simon hian a taksa lamah harsatna a tawh avangin tun hunah hian ka zingah a rawn inlan thei lo a, pawi kan ti hle a ni. A rawn kir leh thuai kan beisei" tiin a inlan loh chhan a rawn sawi. Simon hi kailawnah a che sual a, a insawhnat deuh vangin kar kalta Zirtawp ni khan hospital-ah dahluh a ni. Mahse ngaihtuahawm lutuk a ni lo a, Hospital chhuansanin London-a a chenna-inah enkawl a ni a, show-ah pawh a inlan leh theih thuia beisei a ni. In lam aṭangin show pawh hi a lo thlir a ni awm e.

Kum 58 mi lai ni ve tawh Simon hi Doctor-te chuan kar khat chhung vel inlamah in enkawl rih turin thurawn an pe a, hahchawlh deuh a mamawh rih a ni. Vanduaina a tawh avang hian a kawppui Lauren Sil­verman pawhin New York aṭangin London hi a pan a ni.

Kumina X Factor show hmasa berah hian Simon awm lo mah se Nicole Scherzinger, Louis Walsh leh Sharon Osbourne-te an inlan thei a, show pawh a hmuhnawm hle a ni.