HONTRADE THAZUAL Lengzem ; Feli Fanai a vul zel

Hontrade Ṭhazual Leng­zem-ah Feli Fanai a vul zel a, a zawnin pakhatna a ni. Zorinzuali Khiangte chu a dinhmun ngai, pahnihna-ah awm leh in, Sangkimi Khiangte chuan hma rawn sawnin, top 3-ah a rawn lang thung.

Feli hian a music video hit tak mai, 'Pheichhehmawi I khai ang aw' a tichhuah hnuah chart-ah din hmun sang a luah nghal chat a, hei hi duh tawk mai loin a zawnin pakhatna a hauh. 'Pheichhehmawi I khai ang aw' hi tlangzarh anih aṭangin chart-ah pathumna a ni nghal thei a, pahnihna-ah chho lehin, tun hi a thleng ta a ni. Feli chuan, "Kan thawhrimna leh inpekna a hlawhtling a, ka lawm khawp mai. Miten min ngaihhlut sak avangin ka beisei leh rin phak bakin ka thleng sang a, phurna nasa tak min siam a ni" a ti.

A hla hi Myztic Sailo phuah a ni a, video hi Roar video Production kut chhuak a ni. Feli chuan, "Music video buaipui a hautak em em a, thawhrim a ngai hle. Chutih rual chuan khang kan thawhrimna kha tun dinhmun min hruai thlengtu a ni a, ka thawhpuite zawng zawng chungah lawmthu ka sawi a ni" tiin a thawhpuite avanga hlawh­tlinna chang a nih thu a sawi.

Zorinzuali chuan 'Lunglen a na' tih hla hmangin hun eng emaw chen top chart-ah dinhmun sang a luah tawh a, mite lunglentu ber pakhat a la ni. Sangkimi-i'n 'RM I hmangaihna' a tlangzarhna a la rei lo a, heti chuang hian hma sawn chak hle. A tir lamah a sang pathum zingah lang pha lo mah se, tunah chuan a chung bera awm thei tur khawpin hma a rawn sawn a, a music video hi Champhai lama an shoot niin hmuh a nuamin a hla nen pawh a inrem viau a ni.

Top 3-a hun eng emaw chen awm tawh DJ Lalvenhimi chu tun ṭumah hian pali-na a ni a, a hnuai chiahah Thiam­chantira a awm ve bawk. A sang 10 zingah F. Zomuanpuia, Malsawmtluanga, Josephine Lalawmpuii, Henry Lalmal­sawma Renthlei leh HT Lalthanzami te an lang a, ṭum dang ang bawkin hmeichhe lamin ro an rel leh a ni.

F.Zomuanpuia leh leh H.T. Lalthanzami te hian hla phuahthiam John Mawitea leh Mapuii Fanai te hla 'Hmangaih mengmawite' tih chu music video-in an siam thar leh a, local channel lamah kan hmuh thuai a beisei awm.

HONTRADE THAZUAL Lengzem
1 Feli Fanai - Pheichhehmawi I khai ang aw
2 Zorinzuali Khiangte - Lunglen a na
3 Sangkimi Khiangte - RM I hmangaihna
4 DJ Lalvenhimi - Ka tan I chuai
5 Thiamchantira - Kir an rel lo
6 F. Zomuanpuia - Ka thai mampui
7 Malsawmtluanga - Ka star number one
8 Josephine Lalawmpuii - Ka tlin tawk
9 Henry Lalmalsawma Renthlei - Run hmun leng ila
10 HT Lalthanzami - Ka hmangaih che a sin