I BAHHNUKTE dawn em?

Kum 2019-a CK Hyundai-in, Hyundai Car neitute tana Article inziahsiak a buatsaiha lawmman pakhatna latu; Pu PL. Lalmuankima, Pangzawl ziah 'Ka ngaihtuah hlimna chu' tih zulzuia siam 'BAHHNUKTE' tih film chu zanin dar 7:30 hian Vanapa Hall-ah tlangzarh a ni dawn ta. CK Hyundai-in an intiam angin, film-a siam chhunzawm a ni.

Ticket hi Rs. 100 chauh a ni a, vawiin nilengin Vanapa Hall kawtah zawrh a ni ang. Lersia Play-ah zanin dar 9 vel aṭangin mipui en theih tura chhawpchhuak hman beisei a ni bawk.

CK Hyundai Production BAHHNUKTE director hi Mizo lemchan khawvela mikhual lo tak, Nunna Thar, Scooty leh Norah-ahte hnehsawh taka lo chang tawh - Samie Pachuau a ni a, ani hian tun ṭumah lemchan direct kawngah hma a rawn la ṭan thung a, a hmuhnawm hle dawn tih a chiang reng a, Mizo lemchan khawvel pawh a phuisui zual zel dawn niin a lang. Asst. Director/Director of Photography (DOP) ah BS Pictures (Lalbuatsaiha) a ni bawk.

A changtu ber - Leading part chu Adama leh Hruaia Sailo te an ni a. Mizo film danga lo lang tawh Sangteii Renza, Maruata Rawite, Kima Parousia leh Khenga te bakah zaithiam, mizo film industry a la lang ngai miah lote pawh an lang tel bawk dawn a. Hei hian film en a tinghahhlelhawm a, khawi lam hawiin nge min hruai dawn tih hriat a chakawm tawh khawp mai.