Box Office roreltu 'Black Adam'

'Shazam!' spin off film aṭanga siam ,DC Extended Universe film 11-na 'Black Adam' hi DC Comics character behchhana siam niin, US Box office chart chung berah a rawn inhlangkai nghal a, North America-a theatre 4,402 aṭangin tlangzarh ni bikah USD mtd 26.8 a lalut, film entu zinga 64% te chu mipa an ni.

He film hi tlangzarh karah USD mtd 62.2 vel lalut tura beisei a ni a, July thlaa tihchhuah “Thor: Love and Thunder” hnua tlangzarh kara USD mtd 50 chuang lalut thei pahnihna tur nia chhut a ni.

DC Film tihchhuah zingah Black Adam hi kum 2018-a tihchhuah “Aquaman” (USD mtd 67) leh 2019-a tihchhuah “Shazam!” (USD mtd 53) inkar velah awm tura rin niin, film che ṭha hluai tiha han sawi tur chu ni lo mahse film vantlang tak ni chho tura rin a ni. Heng film pahnih vekte hian mipui la hmelhriat tam loh character min chhawpchhuah sak a, a chhunzawmna siam chhoh zel niin tunah chuan film lar pangngai tak rawn ni tawhin, nakkum hian a chhunzawmna tihchhuah leh tura ruahman a ni.

The Rock channa 'Black Adam' hi USD mtd 195 senga siam niin, November 11-a tihchhuah tura ruahman “Black Panther: Wakanda Forever” an tlangzarh hma chu film liantham tlangzarh tur a awm loh avangin Box office roreltu nih theihna hun ṭha a inhawng zau hle.

Julia Roberts leh George Clooney channa romantic comedy film “Ticket to Paradise” chu pahnihnaah awmin theater 3,543 aṭangin USD mtd 16 lalut tura beisei a ni. Karhmasa lama pakhatna dinhmun luahtu “Halloween Ends” erawh a tlahniam chak hle a, pathumnaah awmin “C+” Cinema Score chauh a hmu phak a ni.