Praise On top 20 puanfel a ni

Branch KṬP mal zai intihsiakna Praise on 2022 intihsiak boruak chu a sang chho zel a, tunah chuan intihsiak hmachhawn tur mi 20 chiah an awm ta.

Kar kalta khan top 50-a in hlangkai te an intihsiak a, mi 50 aṭangin a ṭhazual mi 20 thlan chhuahte hming chu Zirtawpni liam ta zan khan puan a ni.

Intihsiakna hi hmun hrang hrangah neih ṭhin a ni a, top 50 intihsiak kha Republic Presbyterian Kohhran Hall-ah neih a ni a, top 20 round hi Chaltlang Presbyterian Kohhran hall-ah an nei leh ang.

Zaithiam mi 300 chuang aṭanga thlit fimna paltlang chho zel mi 20 te hi October ni 27&28-ah an intihsiak dawn a, music track nen intihsiakna hi an hmachhawn leh dawn a ni.

Synfo leh CKTP buatsaih Praise on hi ṭum dang ang bawkin ngaihhlut a hlawh chho zel a, show neihna hmunah chhim tu an ṭhathnem theih bakah, Live-a pek chhuahna Hruaina Eng Channel leh Synfo Youtube Channel-ah pawh entu an pung chho zel a ni.