Khiangte Construction Ṭhazual Lengzem ; A chung ber mawitu Feli, Michelle, Zaii 'Ka tan i mawi'

Khiangte Construction Ṭhazual Lengzem chart thar berah tunlai hmeichhe lengzem zaithiam sawmhlawh leh huhang ngah pathum - Feli Fanai, Michelle Varte leh Zaii Hauchhum-ten an chevel hmuhnawm tak nena an hlasak "Ka tan i mawi' chu a chung berah a rawn inhlangkai. He hla hi Ronald Zothantluanga phuah niin Feli Fanai Youtube channel-ah mipui en theiha chhawpchhuah a ni tawh a, thlirtu nuai thum chuang an awm tawhin, an punbelh chhoh zel pawh a rinawm.

Pahnihna leh pathumna
Chart hmasa lama pathumna Lalropuii Pachuau hla sak 'Boxer with Crocs' chua pahnihnaah a chho. He hla thu dangdai tak hi Valtea Khiangte phuah niin a hla mawi piah lamah video-a model Kimkimi leh lamthiam Freddie-a te chevel hi video tihlu zualtu an ni.

Pathumnaah hian ṭhangthar zaithiam hming rawn chher chho mek, Lawmi Chhakchhuak hla sak 'Ṭah ruai ka nuam' chu parukna aṭangin a rawn inhlangkai. He hla hi tunlaia lengzem hla lar tak tak phuahtu Rpa Ralte kutchhuak niin, music leh recording pawh hi aman a buaipui nghal a ni.

Top 5-a hla langte
F. Zomuanpuia'n thiam taka a sak 'Valrianga Thinlai' chu palinaah awmin, KR Robert ft Tuaisiala 'Millionaire fanu' tih hla dangdai tak chu panganaah a awm bawk

Hla lang dang te
Ṭhazual Lengzem Top 10-ah hian Asangi GT 'Chantir rawh', Zorinzuali ft Gnie 'Ka Saltanna', Zaii Hauchhum 'Hmangaihna ka hua', Awmtea Polymer 'Vangpui', Grace 10:45 'Vawi sawm li leh nga' te an lang bawk.