India sorkarin PUBG a ban dawn em ni?

India sorkar chuan tunlaia khawvel pum huapa mobile game lar PlayerUnknown's Battlegrounds (PUBG) a ban mai thei niin media ṭhenkhat report-ah chuan an tarlang.

Thla khat vel liam taah khan India chuan Chinese mobile app 59 a ban a, chung zingah chuan India ram leh khawvel hmun hrang hranga mobile gamer-te game khelh nasat ber pawl PUBG chu a tel ve lo. PUBG player-te hlimin an lawm. Hlim takin an ṭhiante nen zankhaw tairek thleng thleng an inkah chhunzawm a, lockdown lai a lo ni bawk nen, ṭhalaite titi pui ber pakhat a tling.

Nimin, Thawhṭanniah erawh thil danglam a thleng a, India sorkar chuan  apps a khap takte nihphung anga siam, clone apps 47 khapna thupek thar a tichhuak leh. Clone mobile apps 47 khap zingah hian Tik Tok Light leh Cam Scanner Advance pawh an tel. Sorkar laipui hian Chinese company-te'n India rama investment an tihna turah pawh khuahkhirhna khauh zawk a lo siam tawh bawk a ni.

 

Clone apps a khap bakah hian tunah hian application dang 275 chu privacy violation leh nation security tana hnawksak nia ngaiin a enfiah leh mek tih report a awm a, hei hian gamer tam tak rilruah hlauhthawnna a thlen ta a ni. India rama khap tur list thar ber tur, enfiah mek zingah hian game lar tak PUBG hi a tel ngei niin an ngai a, moneycontrol phei chuan sorkarin a khap dawn leh dawn loh a ngaihtuah niin a tarlang hial. (hei erawh an source a tarlang lo)

Hetianga thu a darh takah hian India rama netizen ho chuan google lamah PUBG ban kaihhnawih hi an zawng nasa nghal hle a, nakin lawkah thuchiang a la hriat turah ngai ang.

Ireland lam mi Brendan Greene design game PUBG develop-tu chu South Korean gaming company 'Bluehole' an ni. Kum 2017 khan China sorkar chuan tharum thawhna a tam avangin an khap dawn tih thuthang a awm a, hemi hnu lawk hian China sorkar chuan PUBG ngainatute chu an pawmpui thlap game, PUBG ang chi chhawp chhuah sak a tum tih tarlan a ni zui bawk.

Chumi chu remchangah lain Chinese company Tencent an rawn inrawlh a, PUBG Corporation thawhpuiin Mobile version an siam ta a, game share 10% an chang zui bawk a ni. PUBG 90% chu Chinese a nih si loh chuan ngatinge khap hlauhawm zingah a tel kan ti a ni mai thei, mahse China National Intelligence Law, 2017 hnuaiah chuan China behchhan tech company zawng zawngah chuan thuneihna an nei miau a, China sorkarin a dil a nih phawt chuan information an dil ang an pek a ngai ta a ni. Hei tak hi India sorkar bakah khawvel ram dang sorkar lu tihaitu chu a ni bawk.

•    PUBG hi a tirah chuan  Microsoft Windows-a khelh theih tura tlangzarh a ni.

•    Kum 2018 khan Mobile version hi tlangzarh a ni chauh.

•    Game hralh kal ber leh khelh nasat ber pawl a ni.

•    Kumin thleng hian copy maktaduai 70 chuang an hralh tawh a, PUBG Mobile hi vawi maktaduai 600 vel download a ni tawh bawk.