Hri leng karah Norway-in Tom Cruise film chan phal

Mission: Impossible 7 shooting neih chho ṭan a ni a, a changtupa ber tur Tom Cruise chu Norway sorkar chuan Covid-19 hri leng mah se an rama film chan phalna a pe.

Agriculture and Food minister Olaug Bollestad chuan chanchinthar tehdarhtute hnenah an rama film shooting chu inkhuahkhirhna ṭha tak hnuaiah an remtih thu a sawi. Cruise leh he film buatsaihtute hi quarantine an ni dawn lo bawk.

Norway an kal hmain Covid-19 an kai nge kai lo test an neih pui vek dawn a, an thlen hnuah pawh uluk taka test pui leh an ni ang. An fihlim a nih chuan quarantine an ngai dawn lo a ni. Mission: Impossible 7 hi Paramount Pictures kaltlangin nakkum November 19-ah tlangzarh tum a ni.