Kanye West thawhpuite an inhnukdawk zel

Kanye West chu Juda mite huatna lam hawi zawnga a ṭawngchhuah avangin, talent agency CAA, luxury fashion house Balenciaga leh American multinational investment bank JP Morgan Chase-ten Kanye an thawhpuina an titawp tih an puan hnuah, kum 2013 aṭanga a lo thawhpui tawh German sports giant, Adidas chuan nimin tlai khan an thawhhona an tihtawp thu an puang ve leh.

Morningstar analyst David Swartz sawidanin, Adidas-in rapper Kanye West-a thawmhnaw an hralhchhuahna aṭangin German Company hian kumtin USD tluklehdingawn 2 vel a lalut ṭhin.

A nupui hlui Kim Kardashian pawhin Thawhṭanni khan Juda mite hmuhsitna leh inhuatna ṭawngkam hman chu chu a dem tih thuchhuah a siam bawk.

Twitter leh Instagram chuan Kanye-a antisemitic post chu an kalphung bawhchhiatna tiin a account hi an lo hrek sak tawh bawk a ni.

Kanye hian saltanna chu mimal duhthlanna a nih thu te leh, Covid-19 vaccine chu sakawlh chhinchhiahna "mark of the beast" tihtein a lo sawi tawh bawk. Tun thla tira Paris Fashion Week-ah khan 'White Lives Matter' T-shirt a hak avangin sawisel a kai hat tawh bawk a ni.