Taylor Swift-in 'Folklore' hmangin record a siam

Taylor Swift chuan a album thar 'Folklore' hmangin streaming record thar a siam a, darkar 24 chhungin khawvel hmun hrang hrangah copy maktaduai 1.3 lai a hralh hman bawk.

'Folklore' hian streaming service lian pathum Spotify, Apple Music leh Amazon Music-ah record a siam vek a ni. Swift hian Zirtawpni liam ta khan a album thar hi a tlangzarh a, Spotify-ah chuan tlangzarh a nih nia artist hmeichhia zinga stream hlawh ber a ni nghal a, stream mtd 80.6 lai a nei nghal a ni.

Apple Music-ah pawh darkar 24 chhunga album stream hlawh ber record a siam nghal a, stream mtd 35.47 a nei hman bawk. Amazon Music lamah pawh record thar siam bawkin US leh khawvel pumah  indie/alternative streaming record a siam a ni. Amazon hian figure an tarlang ve lo thung.

Taylor Swift hian album thar a buaipui tih hi a ṭhiante pawh a hrilh lo a, sawi lawk loin a studio album pariatna hi a tlangzarh thut a ni. A album thar buaipui puitu Aaron Dessner chuan a fanu bulah takngial pawh Swift nen album an siam tih a sawi lo.