Yamaha Fiamthu Fest a hmuhnawm ; Nakzanah top 10 result puang dawn

Yamaha Fiamthu Fest chu a hmuhnawm chho zel a, Thawhlehni zan khan top 10 intihsiakna neih leh niin, con­testant-te an che ṭha tlang hle. Naktuk zanah top 10 puan ni dawn a, mi pathum an tla ang.

Thawhlehni zana intihsiakah hian Laldawmliana chuan bul a rawn ṭan fuh hle a, inelna boruak rit tak pawh a rawn tidai a tih theih ang. Entu mipui an hlim a, contestant-te pawh an phur hle. Boruak nung sa rawn chhemalh zual turin Lalnunsanga a rawn ding chhuak ve leh a, thawm a ring sawt. Fiamthu khawvela mikhual lo tak Nunsanga hian mi bik a nih zia a rawn pho lang a, chutih rual chuan a taksa lamah harsatna a tawh deuh avangin a thawm a ring tawk lo.

Ṭum dang ang bawkin C. Lalhmangaihzuala a rawn che ṭha leh pek a, fiamthu thiam hmel pawh pu lem lo tak hian mipui a tinui nasa hle. Kanghmun pa kam chhuak hi entu mipui lamin nuih chanin an chang a ni ber a, a thusawi apiangah thawm a ṭha thei hle. Comedian Search-a pa­khatna lo ni tawh Lalrinfela Fanai a rawn ding chhuak ve leh a, a ni pawhin beisei a rawn phak. Rinfela fiamthu thawh an nuihpui zo chiah tihah V.L Dinsanga a rawn lang ve leh a, a ni pawh a rawn che hit rem rem hle. A thusawi a nuihzatthlak a, lawm pawh a hlawh hle a ni.

Chawlhlawk a zawh hnuah Central Jail veng tlangval Zorem­­siama a rawn inlan ve leh a, ani pawhin a thiam a la theih­nghilh lo. A hma lama mite boruak an rawn khuh hawng ṭha bawk a, a ding chhuak apiangin lawm an hlawh zual emaw tih mai tur a ni. Hrangkapchhunga'n endiktute mit a tlung a, a chet ṭhat ber ṭum erawh a ni lo.

Ṭuahzawl khua tilar thei khawpa fiamthu thiam Lal­hmingmawia a rawn pen chhuak ve leh a, a dawt chiaha inlan A. Lalhlimmawia nen tunge che ṭha zawk hriat thiam harsa khawpin an tiṭha dun. Anni pahnih hi top 10-ah chuan a hmuhnawm ber pawl an ni a, an tling zui zel a nih pawhin a mak lo ang. A hnuhnung berah Lalngaihsaka a rawn ding chhuak a, hnu khar tur awm renga mawi a ni. Zan reiin fiamthu thiamte thiamna a umbo sak lo tih chiang a, a inlan hnhnung apiang an thiam emaw tih mai tur a ni. Ngaihsak'a lawm a hlawh a, fiamthu thawh paha a che chu hmuhnawm a tling.

Judge-te'n contestant zingah tihtlak tur an van viauin a rin­awm a, mahse an vaia inelna an hmachhawn reng a rem si lo. An thutlukna chu eng pawh nise contestant-te'n an pawm thiamin a rinawm.

Naktuk Zirtawpni zan dar 8-ah result hi puan a ni dawn a, top 10 aṭanga tlate hian Rs. 5,000 zel an dawng ang. A tling mi pasarih ten inelna an hmachhawn leh nghal dawn a, Zonet Rimawi-ah live-a pekchhuah ṭhin a ni.

Top 10-te chu
1. Laldawmliana Saitual
2. Lalnunsanga Folkland
3. C. Lalhmangaihzuala Kanghmun
4. Lalrinfela Fanai Darlawng
5. V.L Dinsanga New Serchhip North
6. Zoremsiama Central Jail Veng
7. Hrangkapchhunga Zemabawk
8. Lalhmingmawia Ṭuahzawl
9. A. Lalhlimmawia Lawngtlai (Thingkah)
10. Lalngaihsaka ITI Mualpui