Megan Fox a ṭawng chhuak

American actress Megan Fox chuan Hollywood studio-te chu sum duh uchuakah leh, an mihringpuite pawh zah lohah a puh.

'Transformers : Revenge of the Fallen' star chuan, "Hollywood-ah hian hun thim tak a thleng ṭhin. Studio-ah film changtuten harsatna kan tawk ṭhin. Mihring zahawmna aiin sum dah lal a ni ṭhin a, mimal zahawmna a pawimawh lo a, mipui ngaihdan aiin sum a pawimawh zawk a ni. Film siam nana budget

$ mtd 100 vel ruahman a nih tawh chuan a changtuten hlutna kan nei lo a, sum ringawtin a buaipuitute rilru a luah khat tawh ṭhin a ni" tiin sum an dah chungnun thu uar takin a sawi.

Megan Fox hian a thil tawn tawh aṭanga sawi chhuak a nih hmel a, Hollywood kalphung fuh tawk lo a tih thu hi tun hnai khan a tlangaupui a ni. "Studio system a fuh tawk lo a, kalphung thlak ngai eng emaw zat a awm a ni" tiin, a ṭhahnem ngaih thu a sawi uar hle. A la duh tawk mai lo, shooting an neih pawhin an hmel a lan ṭhat chuan an taksa lama harsatna an neihte ngaihthah sak an nih thu sawiin, shooting laia inhliam palh pawhin an hna an tih a ṭul tho zel tih a sawi bawk.

Kum 31 mi hian 'Equal pay for equal work' a ngai pawimawh viau bawk a, mipa leh hmeichhia hlawh inthlau lutuk chu ṭha a tih lo thu a sawi uar hle.