UK Box Office-ah Thor-in ro a rel

UK Box Office-ah Thor : Ragnarok chuan sum lakluh tamah ro a rel a, kar khat chhungin £mtd12.38 a la lut.

Thor hian tlangzarh ni ah £mtd 7.23 a la lut nghal a, kar khat chhunga a lakluh zawng zawng hi £mtd 12.38 lai a ni. Thor hmasa ber chu May 2011 khan tihchhuah a ni a, Thor: The Dark World chu November 2013 khan tlangzarh leh a ni. A ṭum thumna atan Thor : Ragnarok chu tihchhuah a ni leh a, sum lakluh aṭanga teh chuan a hlawhtling vek ti ila kan sawi sual awm lo e. A chhuak hmasa te aiin a hnuhnunga chhuakte sum lakluh a pung vek bawk.

Ragnarok bik hian kum 2017 chhunga film chhuak tawh zinga opening weekend-a sum lakluh tam lamah Beauty and the Beast, Guardians of the Galaxy 2, Despicable Me 3, It, Dunkirk and Fast & Furious 8-te chiah phak loh a nei.

Box office-a pa­hnihna chu Jigsaw niin, £mtd 1.85 a la lut a, pakhatna nena an sum lakluh a inthlau hle. Jigsaw hian UK-ah bik tlangzarh a nih hnuah £mtd 6.4 a la lut tawh. Hetih lai hian US Box Office-ah chuan Jigsaw aia sum la lut hnem an awm lo a, $mtd 16.2 la lutin pakhatna a ni chiang hle.

Sum la lut tam pathumna chu The Lego Ninjago Movie a ni a, a sum lakluh zat chu £889,802 a ni. The Death of Stalin, chuan £812,288 la lutin pali-na a ni a, panga-na chu Blade Runner 2049 (£692,999) a ni. Blade Runner 2049 hi US Box Office-ah chuan a che ṭha viau a, kar hmasa lam khan pakhatna a hauh. Tunah pawh $mtd 3.9 zet a la lut a, US lamah chuan a la hit viau rih a ni. Blade Runner 2049 hian UK-ah bik kar li chhungin £mtd 17.41 a la lut tawh bawk.

Sum la lut tam zingah film chhuak thar Breathe chu a lang a, Geostorm, My Little Pony, Happy Death Day leh Kingsman: The Golden Circle-te chu sum la lut tam 10 zingah an tel bawk.

UK Box Office
1. Thor : Ragnarok £mtd12.37
2. Jigsaw £mtd1.85
3. The Lego Ninjago Movie £889,802
4. The Death of Stalin, £812,288
5. Blade Runner 2049, £692,999
6. Geostorm £659,666
7. My Little Pony, £622,946
8. Breathe £535,675
9. Happy Death Day £434,872
10. Kingsman: The Golden Circle £373,276