Elon Musk-a Twitter a inṭan e

Tesla leh SpaceX CEO, khawvela pa hausa ber Elon Reeve Musk chuan USD tluklehdingawn 44-in Twitter a lei fel ta.

Social networking site a thuneihna a chan aṭanga a thutlukna hmasaberah, Musk chuan Ningani khan Twitter CEO Parag Agrawal leh chief financial officer Ned Segal-te chu a ban nghal a, head of legal, policy, and trust Vijaya Gadde pawhin an rual hian banna a thehlut nghal tih United States-a media outlet-te chuan an puang. IIT Bombay leh Stanford chhuak, Agrawal hian zangnadawmna atan USD mtd 42 a dawng dawn a, Segan hian USD mtd 25 vel a dawng bawk ang.

Kawng a thui
April 25, 2022 khan Twitter-a board of directors leh SpaceX leh Tesla CEO Elon Musk-te chuan USD tld 44 (USD 54.20 per share)-a lei turin inremna an siam. Mahse, inremna an siam hnu hian stock market a tlakchhiat avangin Twitter-a USD 54.20 (per share) leh Tesla stock a lo tlakhniam avangin a man chungchangah buaina an nei leh a ni. Hei vang hian Elon Musk chuan Twitter-a bot chungchanga harsatnate rawn tarlangin, heng bot-te hian mi nunah buaina a thlen nasat zia leh an inremnate pawh chu ennawn a ngaih tur thu a sawi.

July 8 khan, Musk-a lawyer-te chuan spam leh bot account chu chhuanlamah hmangin an inremna siam chu tihtawp an tum thu an sawi. Hemi hnu lawk hian, Twitter chuan Delaware Chancery Court-ah an puhna hi an khinglet a ni. Whistleblower, inbanna lehkha, private text message vantlang hmuha tlangzarh leh inremna mak tak takte tarlan a nih hnuah Court-in deadline a siam hma ni chiahah inremna hi tihfel a ni ta a ni.

'Chief Twit'
Musk chuan "sava chu chhuahzalen a ni ta," tiin Twitter logo-a sava lem chungchang a sawi. Tesla CEO hian a Twitter account bio chu 'Chief Twit' tihin a thlak nghal.

"Twitter ka leina chhan chu khawvel hian hun lo kal zelah pawh inkawmkhawmna hmun khat an neih a, hengah te hian tharum thawhna tel lo leh an ngaihdante thiang zau taka an sawi theihna tura lei ka ni," tiin, "Twitter hi 'everything app' X siamna atan a ṭangkai dawn hle a ni," a ti bawk.

Critics-te chuan Musk-an thuneitu nihna a chan chuan inhuatna ṭawngkam leh thuthang dik lo thlentu lian tak a ni thei tih an sawi a, conservatives tam tak erawhin politics thlir dan dik lo khalh ngiltu tur a ni zawk thei tih an sawi ve thung. Musk hian Twitter chu mi an thunun dan te leh danin a phut piahlam thlenga censorship ngaihthahah a lo puh tawh bawk. Kumin May thla khan, Musk chuan US President hlui Donald Trump-a Twitter account chu tihnun a nih tur thu a sawi a, he a thusawi hi buaina chawk chhuak thei nia an ngaih avangin Twitter lama thuneitute chuan an lathla leh nghal a ni.

Elon Musk hian an platform-a advertising an kalpui danah a lawm loh thute pawh a lo tarlang tawh a, Washington Post-in an hnathawk 75% a ban dawn tiha a report erawh a pha thung.

Musk hi a khat tawkin politics lama inrawlh chang lah a ngah hle. A ngaihdan danglam takte chuan mite ngaihven pawh a hlawh phah hle a ni.

Twitter chanchin
Kum 2006, March thla khan Jack Dorsey, Noah Glass, Biz Stone leh Evan Williams-ten Twitter hi an siamchhuak a, hemi kum vek July thla khan mi nawlpui hman theihin an chhawpchhuak a ni.

Twitter hian San Francisco, California-ah hmunpui neiin khawvel ram hrang hrangah an inzarpharh tawh. Kum 2012 khan khawthlang ramah Twiiter hi mi nawlpui zingah hmangtu chu pung chho ṭanin, a hmangtu mi mtd 100 chuangten nitin tweet mtd 340 chuang an nei tawh. Kum 2020-a Covid-19 hripui len hnu phei kha chuan hmangtu hi an pung chak hle. Kum 2022 a rawn inherchhuah meuh chuan nitin tweet mtd 500 chuang awm ziah anga chhut a ni a, khawvel pumah mi maktaduai 436 velin an hmang mek a ni.