Taylor Swift-i'n 'Call It What You Want' tichhuak

Taylor Swift chuan a hla thar "Call It What You Want" chu a tichhuak ta a, ngaihven a hlawh nghal hle.

Swift hian a album thar tur "Reputation" chu a buaipui mek a, a tichhuak hnai tawh viau. 'Reputation' hi a studio album parukna tur a ni a, heta a hla pali chu a lyrics nen a lo tichhuak tawh a ni. "Call It What You Want" hi a tichhuah thar ber a ni a, a hmaa mite ang thoin a hit leh pek viau tura beisei a ni. Sawizui leh ngaihven hlawh ber erawh British actor Joe Alwyn nena an inkar thu bawk a ni.

Swift hian a hla thar lyrics hi a teaser a lo tichhuak tawh a, social media lamah chuan topic lian tak a ni nghal der. "Call It What You Want” hma hian "Look What You Made Me Do" chu a lo tichhuak tawh bawk a, a lar nghal vet vet hle. Hei bakah hian "...Ready for It" leh "Gorgeous" te pawh a lo tichhuak tawh a, an lar em em vek a ni. Chart hrang hrangah hmun sang an luah vek a, record siam pawh an awm nawk a ni. "Look What You Made Me Do" hi a lar ber a tih ngam a, sum pawh a hailut hnem hle.

Tuna a tichhuah leh tak hi a landan chuan kum 2008-a a lo tihchhuah tawh "Love Story" nen khan a inzul viau a ni awm a, hmangaihna lam hla bawk a ni. A lyrics hi billboard chuan a tichhuak tawh a ni. Taylor Swift hian November 10 hian a album thar "Reputation" hi a tlangzarh tawh dawn a, nghahlelh man a awm viau turah ngai ila a sual awm lo ve.

Swift hian chanchin a ngah mawlh mawlh khawp mai a, London-ah in thar a lei a, tunah a hla thar a tichhuak leh tawh a, kar leh lamah album thar a tichhuak dawn bawk. Heng zawng zawng aia ngaihven hlawh zawk chu a bialpa Joe Alwyn nena an inkar a ni. Anni pahnih hi hun eng emaw chen an inzui tawh a, London khawpuiah phei chuan hmuh tur an tam ve viau ni tur a ni, an chhuak dun thlalak hmuh tur a tam fu mai.