I MLTR dawn em?

Khawvel pum huapa rock group lar Denmark chhul chhuak Michael Learns to Rock (MLTR) chuan "BACK ON THE ROAD" tour neiin India ram khawpui pasarihah leh Asia ram hmun hrang hrangah concert an nei dawn a. India rama an tour 'kick off' nan Aizawl an hman dawn vangin a phurawm lehzual a, Aizawl an lo kal dawn tih kan hriat phei kha chuan social media a luahhneh nghal hle a, MLTR ngainatu kan tam tih a tilang chiang a ni. Lammuala an zai zawh hnuah ram dangah eng ang pawhin lo zai mah se, ‘Ka ngaithla daih tawh!’ ‘Thla ka lakpui daih tawh’ ‘Ka hmuh hnu’ tiin insawitheihna a awm dawn bik tlat!

MLTR hi kum 1988 khan an ding a, kum 1991 khan an album hmasa ber ‘Michael Learns to Rock' chu an tichhuak. An music hi soft rock,pop leh ballad inchawhpawlh a ni a. Mizote bengfah zawng tak mai music a lo ni kher bawk nen,an vanglai chuan Zofate zingah tuipui lo an awm lo vang tih theih hial khawpa thawm nei lian an ni. A hmei a pa,a pui a pang in an hla lar ho hi chu ṭhian zaho pawha sak rual dual dual a kan zawm theih vek anih vangin Aizawlah ngei mai an rawn chuang chhuak tur hi a nghahhlelhawm takzet.

Ticket hi Inrinni liam ta aṭang khan online-in BookMaster aṭangin a lei theih tawh a, ticket-te hi kan budget a zir zelin Rs. 920 aṭanga VVIP Lounge Rs. 10,020 inkar duhthlan tur a awm. Online lama ticket an hralh dan a zirin, November 15 hian ticket hi zawrhchhuah tura ruahman ni bawk mah se, chan loh a awm theih avangin online-a lei fel hmat erawh a finthlak ang.

Khawvel huapa band lar chah chhuaktute hi tun hnaia event management firm ṭhangduang tak Alpha Omega an ni.Alpha Omega hian kumin July thla khan Inter School Quiz and Personality Competition, Mizoram Academic Competition (MAC22) pawh hlawhtling takin an lo buatsaih tawh a ni.