Praise On 2022 inelna boruak a sang chho zel

Branch KṬP mal zai intihsiakna 'Praise on 2022' neih mek chu a hmawr bawk a hnai chho zel a, final round-a intihsiak tur mi 10 te hming puan chhuah a ni leh ta. Inelna a san chhoh tawh ang bawkin, branch tinte pawh an aiawha chhuakte an ṭawiawm ṭha ṭhin hle.

Top 20 round hi zan hnih, kar hmasa Ninga leh Zirtawp zan khan Chaltlang Presbyterian Kohhran Hall-ah Sound track hmangin an intihsiak. Intihsiakna neih a ni zawh veleh top 10-a in hlangkai te hming chu puan chhuah nghal a ni.

Top 10 round chu November 8 leh 17,2022 zanah Mission Vengthlang Presbyterian Kohhran Hall-ah neih a ni dawn a, November ni 8, 2022 zanah Kristian Hlabu ami an duh ber an sa ang a, November 17, 2022 zanah anmahni hla duh zawng hmangin intihsiakna an nei leh ang.

Mi 10 aṭang hian pakhatna, pahnihna leh pathumna thlanchhuah an ni dawn a, result puan leh lawmman sem chu November 18, 2022 zanah Mission Vengthlang Presbyterian Kohhran Hall-ah neih a ni ang.

Praise on 2022-a pakhatna hian Rs. 1,00,000 a dawng anga, pahnihna in Rs. 50,000; pathumna in Rs. 30,000 leh Top Ten tling chin te'n Consolation Prize Rs. 7,000 ṭheuh an dawng dawn bawk.