Hybe, YG Entertainment leh K-Pop giant-te hoin an hmalakna ṭhulh

Seoul khawpuia Itaewon district-ah Inrinni liam ta zana Halloween party nei tura kalkhawmte inpawngnekna avanga mi 150 chuang an thih hnuah BTS, Tomorrow X Together, Aespa, P1Harmony, Twice leh K-pop artists dang ṭhahnem takte chuan an hmachhawp neihte tihkhawtlai emaw ṭhulh emaw tur thu an puang.

Itaewon hi zan lam intihhlimna an uarna hmun lar tak a ni. Ṭhalai tam takte chu Halloween festival hmang turin hlim takin an kalkhawm a, mahse innek buaina rapthlak tak hi a thleng ta a ni. Thi zingah hian Mnet idol survival program "Produce 101 Season 2" a contestant zinga mi Actor Lee Jihan pawh a tel.

South Korea president Yoon Suk-yeol chuan rampumah sunna hun hman a nih tur thu a puang a, Korean-pop industry pawhin President thuchhuak chu ngaipawimawhin, mipui punkhawmna lam thilte chu huaihawt lo turin thupek an tichhuak nghal.

Label leh management company, YG Entertainment (Blackpink, Big Bang, Winner, Treasure enkawltu) pawhin thuchhuah siamin, an zaithiamte programme chu ṭhulh lailawk vek a nih thu an sawi.

Hei bakah hian, Pentagon, Mamamoo leh Golden Child-te ho rual inlanna tur, 2022 Busan One Asia Festival’s K-pop concert pawh hman loh an titlu bawk a ni.