Twitter-in blue tick verification badge nei hnenah thlatin USD 20 la dawn : Report

Elon Musk chuan tunlai social media platform ṭhangduang tak Twitter-a thuneitu ber dinhmun a chelh hnu lawkah, an verification process-te chu siamṭhat a nih tur thu a sawi. Musk chuan "account chungchanga finfiahna kan kalpui dan chu endik chhoh mek a ni," tia tweet-in danglamna thleng a awm nual tura beisei a ni.

Twitter Blue subscription thar siamin, ‘Blue tick’ nei account verified tawhte pawhin he dan thar hi an zawm a ngai tawh dawn. Twitter Blue subscription hi thlunzawm fel an nih hunah Musk chuan subscribe man hi a tahtawla tihsan zel a tum niin an tarlang.

Verge report danin, Musk hian Twitter Blue subscription neite chuan thlatin USD 19.99 (Rs 1,600 vel) an chawi ziah a ngai dawn tih a sawi. Twitter account-a verification nei sa te pawhin heng dan tharte hi an zawm a ngaih dawn avangin thla tin pawisa an chawi a ngai tawh ang. Ni 90 ral hmaa Twitter Blue-ah an inthlak loh chuan an checkmark hi an hloh thei. Hei bakah, Twitter-a thawkte chu subscription plan thar kalpui vat tura thupek an ni a, an ti thei lo a nih chuan an company chhuahsan turin a chah. A hnathawkte chu November 7 thleng deadline a siamsak niin report chuan a tarlang bawk.

Twitter Blue Subscription
Twitter Blue hi nikum khan tlangzarh niin, pawisa chawia subscribe-te chuan premium feature hrang hrang an dawng a ni. Twitter subscription service hi US, Canada, Australia leh New Zealand-ahte kalpui mek a ni a, tunah Musk hian khawvel puma kalpuiin payment structure-te thlak danglam vek a tum a ni.