‘Avatar: The Way of Water’ a rei dawn

Box office aṭanga sum hailut hnem ber, James Cameron-a kutchhuak science fiction film 'Avatar' chhunzawmna tur, 'Avatar: The Way of Water' chu kumin December 16 hian tlangzarh a ni dawn a, darkar 3 leh minute 10 zeta rei a ni dawn niin The Hollywood Reporter chuan a tarlang.

Avatar 2 hi Hollywood movie hlawhtling tak pahnih, Avengers: Endgame (darkar 3 leh minute hnih) leh Cameron-a kutchhuak tho, Titanic (darkar 3 leh minute 14)-te huangah a awm dawn. Heng film pahnih te hi khawvel puma sum lakluh tam lamah pahnihna leh pathumna dinhmun an hauh mek a ni.

Avatar film hmasa zawk kha kum 2009, December thla daih tawha release ni mah se, tun thlengin film sum lalut tam ber a la ni fan a, kha film kha darkar hnih leh minute 41 zeta rei a ni.

Covid-19 hripui len hnua film tihchhuahte hi a thui sawt ta hle a, Hollywood film liantham deuhte chu darkar hnih leh minute 30 vela rei an ni tlangpui. Film kalhmang pangngaiah chuan film thui tak an ni a, kumin kumtawp thlengin he trend hi an kalpui dawn a nih hmel. Kumina film tihchhuah hmabak, Babylon (darkar thum), Marvel leh Disney kutchhuak 'Black Panther: Wakanda Forever,' (darkar hnih leh minute 41)-te pawh hi entute mawngkham hman tur khawpa film sei an ni e.