Hip-Hop artists hausa ber Jay-Z
American rapper Shawn Corey Carter, Jay-Z tiha hriat lar chu hip-hop artist zingah a hausa ber niin hetiang lam buatsaihtu, forbes editor hlui Zack O’Malley Greenburg chuan a tarlang. Jay-Z hausakna hlutzawng hi USD tld 1.5 hu zet a ni. Heng sum te hi real estate leh spirits bakah startups aṭanga a lakluh an ni. Diddy pawh tld huangah hian rawn langin, Gilbert “Berner” Milam pawh cannabis cookie empire vangin a rawn inhlangkai. Juda mite chunga ṭawngkam mawi lo tak a hman avangin Kanye West chuan a sumdawn pui ṭhahnem tak a chan a, hei vang hian billionaire a nihna pawh a hloh phah nghe nghe a ni.
Forbes a chhuahsan hnuah Greenburg hian kumtin “Highest Paid Hip-Hop Artists” chu a tichhuak ṭhin a, hripui len vanga kum thum a chawlh hnuah kumin hian list hi a tichhuak ṭan leh a ni. Artist hausa zual pangate hausak zawng chu hri len hma aiin USD tld 3.17 (20%) in a sang zawk a ni.
1. Shawn “Jay-Z” Carter (USD tld 1.5) :
Hip Hop artist zinga billionaire hmasa ber Jay Z sum lakluhna hnar hi Armand de Brignac champagne leh Roc Nation entertainment company, Rihanna Savage x Fenty lingerie line leh company dang tam tak a thawhpuina aṭanga a lakluh an ni.
2. Sean “Diddy” Combs (USD tld 1) :
Diddy hi hip hop artist aṭanga billionaire ni thei pathumna niin, Cîroc, DeLeón tequila Revolt, music catalog leh startup investments aṭangte in a lalut
3. Kanye “Ye” West (USD mtd 500) :
Ni khat thil thuah billionaire a nihna hloh mah se, West hian a nupui hlui Kim Kardashian-i shapewear line-ah stake 5% a la nei a, music catalog leh a pheikhawk mai to tak Yezzy aṭangin sum ṭhahnem tak a la lalut tho a ni.
4. Gilbert “Berner” Milam (USD mtd 410) :
Bay Area rapper hian a Cookie cannabis sumdawnnaah marijuana kaihhnawih product a siam aṭangte leh state tamzawkin khuahkhirhna dan an hlih chhoh zel avangin a palinaah a rawn invawrh chho thei.
5. Andre “Dr. Dre” Young (USD mtd 400) :
Hip-hop aṭanga USD tluklehdingawn chuang lalut hmasa ber nia inchhal hian kum 2014 khan Apple hnenah USD tld 3 zetin Beats Music leh Beats Electronics chu a hralh a, mahse chhiah a pek hnua USD mtd 800 vel nei anga chhut a ni. Beats cofounder Jimmy Lovine nen thawkdunin University of Southern California hnenah USD mtd 70 an hlan a, Los Angeles-a Tom Brady leh Giselle Bundchen-te mansion chu USD mtd 40-a a leisak hnuah Dre hi panganaah a la lang phak tho a ni.