Oil Palm leh Leonardo DiCaprio Johnny Depp leh a ui

Tunhnai khan Leo­nardo DiCaprio chuan In­stagram-ah Malaysia rama oil palm chinna hmun, chung lam aṭanga thlalak chu a tar chhuak a, a caption a ngaihnawm hle.

Leonardo hian a cap­tion-ah hian, "Kuala Lumpur khawpui, Ma­lay­­sia ami chu oil palm hmunin a hual khup mai. Oil palm hi terrace siamin tlangah an phun a, terrace hi lei kalral ven­na, tui luangin a hrut ral loh nana siam a ni. Malaysia hi tunah chuan khawvela palm oil thawn chhuaktu lian ber a ni tawh a, ei siam nan a

ṭangkai hle a ni. Malaysia hian kum khat chhungin ton maktaduai 18 vel zet a thawn chhuak. Khawvela tropical region-a palm oil chîn an uar zel hi carbon emission lian tak a tling tawh. Palm oil chînna atan tualṭo thing an kit a, chumi avang chuan kum 2020 khi chuan oil palm chînna atan ramngaw vah chereu avang hian atmosphere-a carbon dioxide pun belhna tur hi ton maktaduai 558 zet a tling tawh dawn a ni. Heti zat carbon dioxide hi fossil fuel (tuialhthei, lungalhthei leh natural gas) hal khu avanga Canada ramin tuna boruak chhia a pek chhuah aiin a tam zawk a ni," a ti.

Oil palm chîn hi Mizoramah pawh intih­hmuh mek zel a ni. Mizo­ram hmun hrang hrangah chîn a ni a, mi tam tak chuan oil palm aṭang hian sum tam tak kan lalut a, kan hlawkpui hle. Mizoram chhungah ngei a hriak herna a awm avangin a awlsam phah lehzual hle. Chutihlaiin oil palm chînna atana ram kan tihchhiat leh a nghawng erawh sawi tham a awm ve ta viau. Envi­ronmentalist-te chuan oil palm hmunin ecology-a nghawng a neih dan pawh an sawi fo ta mai.

Mizoramah hian ram danga hlawhtling taka an chîn ṭhin chu kan fak chiam a, kan lalut a, kan chîng ve mai ṭhin. Sorkar lam hi a uar hlei hleiah a ṭang emaw tih mai tur an ni a, ram dang mau te, ram dang pangpar te, ram dang thlaite kan lalutin kan chîng pung nasa ta hle.

Hetianga ram dang thlaite chîng ve tura kan inzirtir vak lai hian hengte hian Mizoram environment hi engtiangin nge a nghawng dawn tih zirchianna erawh a awm ngai lo niin a lang. Ram danga ṭha leh hlawk kha a nihna ang anga ching turin kan inzirtir nghal chiam mai a, nakinah chuan kan leilung leh environment hian a la tuar viauin a rinawm.

Ram dang aṭanga thlai, thlai chi, thlai ṭiak leh ran kan lakluh turte hian Mizorama awm ngai lo natna hrik an pai em tihte hi kan thuneitute lam hian an ngaihven ngai lo a nih hmel. Hetiangah hian ram changkang a piang an fimkhur a, an ram leh hnam humhalh an tina zawk.

Pirates of the Carib­bean: Dead Man Tells No Tale film kha Aus­tralia-ah chan a ni. A changtu Johnny Depp chuan Australia sorkar phalna ni loin a ui vulh lai chu film an channa hmunah a hruai a, hei vang hian Johnny Depp hi man a ni a, thubuai an siamsak a, pawisa pawh a chawi phah a nih kha. Mizoramah chuan a thei leh remchang apiang hian ram dang aṭang hian thlai leh nungcha hi kan lalut mai a, thuneitute lam hi heti lamah hian an ṭan a, an harh a hun khawp mai.

Sorkar ber hi heti lamah hi chuan fimkhur nachang hre lo a ni foin a lang. Invasive plant leh invasive animal hlauh­awmna pawh hi a la man pha lo a nih hmel.