Khawvel hnaih bertu Black Hole an hmu chhuak

European Southern Observatory (ESO) astronomer-te chuan black hole thar an hmu chhuak a, khawvel aṭanga light-year 1,000 leka hlaa awm niin black hole an hmuh chhuah tawh zinga khawvel la hnaih bertu a ni.

ESO black hole hmuh chhuah thar hi arsi pahnih nen an inkawp a, heng arsi-te hi mit lawng pawhin an hmuh theih, Black hole dang ang lo takin an bul 'environment' tan chhiatna a thlen nasa lo a, hei vang hian an hmu chhuak har niin mithiamte chuan an ring.

Ni(sun) aiin a let liin a lian zawk a, scientist-te chuan an hriat theih china kan solar system hnaih bertu a nih thu leh mit lawnga hmuh theih triple star system 'HR 6819' siamtu pakhat a nih thu an sawi.

MPG/ESO 2.2-metre telescope hmangin Chile-a ESO La Silla Observatory aṭangin black hole kawptu arsi pahnihte hi thla khat chuang an chhui tawh a, kar hmasa lamah khan black hole hi an hmu chhuak ta a ni.

Astronomer-te chuan heng arsi pahnihte hian hmuh theih loh thil pakhat chu ni 40 zelah an hel chhuak tih an sawi a, chu thil hmuh theih loh chu ni(sun) aia a let lia lian a nih thu hre theiin, zirmite chuan black hole ni ngeia an hriat thu an puang ta a ni.

Black hole hmuh chhuah thar hi Telescopium constellation-a awm a ni a,HR 6819 system hi khaw thian zanah chuan  southern hemisphere aṭangin mit lawngin a hmuh theih.

ESO scientist Thomas Rivinius chuan, "Van boruakah khian black hole maktaduai tam tak an awm thei a, mahse tlemte chauh kan la hmu chhuak," tiin a sawi a, black hole nia rinhleh dang zirchian mek pawh an la nei a ni.