Batman thar a hmaa mite aiin a 'dark' dawn
DC comic fan-te tan chuan 'dark' tih ṭawngkam hi thil thar a ni lo a, a bikin Batman fan-te tan phei chuan a ni lo lehzual.
The Batman-a Alfred Pennyworth lema chang tur Andy Serkis chuan Batman thar tur chu Batman film hmasa zawng zawng aiin a 'dark' zawk dawn tih a sawi a, Batman fan-te tan chuan thu lawmawm a tling ngei ang. DC fan-te'n Justice League film an sawiselna ber pakhat pawh a 'dark' tawk loh vang kha a ni a, Batman film tharah erawh an beisei ang an hmu dawn niin a lang.
Robert Pattinson 'Batman' thar tur chungchang fan-te'n an zawhnaah Andy Serkis chuan Alfred leh Bruce inkar tarlan a ni nasa dawn tih a sawi a, a hmalama Alfred role lo chang tawhtute chu a entawn dawn lo tih sawiin a danglam dawn hle tih a sawi bawk.
The Batman hi Matt Reeves chuan a direct dawn a, hrileng vangin film an chan mek pawh an titawp lailawk rih a ni. Reeves hian film hmun lia ṭhena hmun khat chu an chang zo hman tawh tih a sawi a, an theih anga hmaa chan chhunzawm a nih dawn thute pawh a sawi tawh a ni. Colin Farrell chu Penquin-ah a chang dawn a, Zoë Kravitz chu Catwoman-ah a chang thung ang. Nakkum October 1-ah tlangzarh hman an tum a ni.