Ruihhlo vanga buai Elton John

Sir Elton John chuan ruihhlo vangin a nunah harsatna a tawh nasat thu leh, a nun tichhetu bulpui ber a nih thu a sawi.

Music legend Elton John hi kum 70 mi lai a ni tawh a, a vanglai hun tam zawk a liam tawh. Mahse tun thlengin ngaihsan a la hlawh a, Thawhṭanni pawh khan Har­vard University-ah thu a sawi. Khawvela Unisersity ṭha ber nihna lo hauh fo tawh Harvard University chuan HIV dona kawnga a hnathawh ṭhat avangin 'Peter J. Gomes Humanitarian Award' a hlan a ni. Elton John chuan, "Music khawvela ka thlen chin kha a ropui thawkhat viau a ni. Nimahsela ka nun zawng zawng min tichhetu chu zu leh drug a ni a, kawng dik loa min hruai luttu a ni" tiin, a hun kal tawh a sawi.

Music khawvela hming dai tawh lo tur Elton John chuan "Tunah chuan midangte ṭanpuina kawngah ke ka pen ve tawh a, harsatna ka tawh ang an rawn tawh lohna turin tih tur tam tak ka nei a ni. Khawvel kalphung hi kan thlak danglam thei lo, mahse a chhunga cheng mihringte chu tihdanglam theih kan ni" tiin a sawi bawk.