Alia Bhatt leh Ranbir Kapoor-ten an fa hmasa ber nei ta

Bollywood star nupa, Alia Bhatt leh Ranbir Kapoor-te chuan nimin khan an fa hmasa ber atan hmeichhia an nei.

Alia Bhatt hi nimin zing dar 7 khan HN Reliance Foundation Hospital, Mumbai-ah hruai a ni a, chhun dar 12:05 khan hlawhtling takin fa hi a nei thei a ni. Hemi hnu lawkah, Alia chuan "Kan damchhunga chanchin lawmawm ber chu; Kan naute a lo piang ta...hmeichhe naute duhawm tak ava ni em. Hmangaihnain kan khatliam a, malsawmna leh vanneihna dawngtu nu leh pa kan ni," tiin Instagram-ah an naute thar vanga an lawm zia an tarlang.

Alia leh Ranbir-te hi kumin April thla khan Mumbai-a an chenna Vastuan-ah ropui takin an innei a, June khan Alia chuan a rai thu hi a puang.

Thla hmasa lawk khan, 'intimate baby shower ceremony' chu Kapoor leh Alia chhungkuate chuan mi sawmbik tlemte te nen an hmang bawk.

Hetihlai hian, Alia Bhatt leh Ranbir Kapoor-te channa 'Brahmastra' film pawh a hlawhtling hle a. Alia hi a vawi khatna atan Hollywood-ah kan hmu dawn bawk a, Wonder Woman star Gal Gadot nen 'Heart Of Stone' tih film-ah an chang dun a ni.