Zaithiam Aaron Carter a thi

Kum 1990's tawp lama American rapper, zaithiam leh lemcham a thiam piah lamah Backstreet Boys star Nick Carter-a nau a lo nih bawk avanga mite hriat hlawh, Aaron Carter chu kum 34 mi niin Inrinni liam ta khan a thi.

Aaron hi Lancaster, California-a a chenna inah Inrinni zing khan thia chhar a ni a, a thih chhan erawh tarlan a ni lo.

A hun hmasa lam
December 7, 1987 khan Tampa, Florida-ah lo piangin, a unaupa Nick Carter hnungzuiin kum 1997 khan Backstreet Boys tour leh concert-ahte a lo inlan tawh. A album hmasa ber, 'Aaron Carter' chu kum 9 mi lek anih laiin a tichhuak a, copy maktaduai chuang hralhin gold status hial a thleng phak a ni.

A album pahnihna, Aaron’s Party (Come and Get It) chu September, 2000 khan a tichhuak leh a, hei pawh hi a hlawhtling lehpek hle a triple-platinum hial a thleng pha. Kum 2001 khan a album pathumna 'Oh Aaron' chu tichhuakin, album dang pahnih a khawr pum hnuah, kum 2018 khan 'Love' chu tichhuakin, a album hnuhnungber a ni ta a ni.

Film lamah pawh inlanna a nei nual, heng zingah hian Lizzie McGuire, Sabrina, the Teenage Witch leh 7th Heaven bakah Fat Albert (2004) leh Channing Tatum nena an channa, Supercross (2005) leh film dang ṭhahnem takah a lo inlan tawh bawk.

Kum 2021, November thla khan Melanie Martin nen an fa hmasa ber atan mipa an nei. Carter hi a hun tam zawk chu ruihhloin a tibuai ve hle a. A fapa kianga a awm theihnan September thla khan a vawi ngana atan rehab-ah a lut. Amah pawhin a talbuai thu hi a zep lo a, kum 2017 khan 'The Doctors'-ah ruihhlo bawih aṭanga talchhuah a tum dante pawh a lo tarlang tawh a ni. Thla hmasaa tihchhuah, No Jumper podcast-ah khan Carter chuan, "Ka hun tawnte kha nuam ka ti hle a, lo kir tur pawhin hma ka la mek a ni," tiin rimawi khawvelah lo let a tum thu a sawi. "Lar hi ka buaipui ber a ni lo, a chhan chu industry-ah hian larnain a ken tel tam tak chu ka paltlang tawh a ni. Roller coaster-a chuang ang mai hian a sang lai ber leh hniam lai ber ka thleng tawh tlat a. Zaithiam, hlaphuah thiam leh mi hmaa inlan ṭhin ka ni a, hei hi ka eizawnna a nih avangin beidawng loin ka bei zel ang," tiin a thih hmain a tuina berah kir a tum dante a sawi.