Zaithiam C.Sanga kan chan ta ; Vawiinah vui liam a ni dawn

Mizoten zaithiam kan neih zinga langsar ber pawl, C.Vanlalsanga (C.Sanga) chu nimin zing dar 7:45 khan Internal Vein Thrombosis natna avangin Aizawl Hospital-ah a boral a, vawiinah vui liam a ni ang.

A thih thu hriat a nih veleh Venghlui Branch YMA chuan Emergency Committee ko nghalin, a ruang tlaivarpui turin thutlukna an siam a, vawiin chhun dar 12:00 hian Aizawl Central Hall-ah vui a ni dawn a ni. C. Sanga thih thu hian mipui a barakhaih a, lainattu leh uitu an ṭhahnem hle.

C.Sanga hi a taksa lamah harsatna a neih avangin kumin July thla khan Nazareth Hospital-ah dahluh a ni a, Internal Vein Thrombosis a vei tih hriat chhuah a ni.

August 5 khan NEIGRIHMS, Shillong panpui a ni a, a natna hi zai chi a ni loh avangin in lamah inenkawl tura tih a ni. NEIGRIHMS-ah hian September 12 khan kalpui leh a ni a, nakkum kum tir lamah kalpui leh tura tih a ni. Mahse nimin zing khan a nupui fanauten an kaitho tur chu kaihthawh theih a ni ta lo a, Aizawl Hospital panpui nghal ni mah se, chhan hman a ni tak loh avangin kum 42 mi lek niin a boral ta a ni.

Mizo mipa zaithiam zinga aw pa tia an sawi ṭhin, C.Sanga hi June 30, 1975 khan Aizawl Hospital-ah a piang a, kum 2014 khan H. Lalmuankimi nen an innei. Mamuani nen hian fapa pahnih an nei a, Venghlui, Aizawl-ah an chhungkuain an khawsa a ni.

Zai lamah
C.Sanga hian naupang tê a nih aṭangin music leh zai lam a ngaina hle a, guitar perh chu a nuam tih ber pakhat a ni. A pa C.Lalzuia a zaipui ṭhin bakah, guitar-te a perhsak ṭhin. Kum 2003 khan KṬP Venghlui Branch Collection-ah a zai a, hei hi zai lama a bulṭanna pakhat chu a ni.

Kum 2003 vek hian ama pualin album a tichhuak a, "Future ava Bright lo em' tih a ni. Radio leh local channel lamah a lar viau a, thlan hlawh ber pawl a ni.

Kum 2007 khan 'Tawngmang Lasi' album a tichhuak leh a, hei pawh hi a hlawhtlinpui hle. Zaithiam a nih mai bakah hian hla phuah lamah pawh sulhnu ṭha tak a hnutchhiah a, hla 100 chuang zet a phuah hman.

A hla phuahte hi Pathian hla, Lengzem leh Lenglawngte a ni hlawm a, aman a thluk a siam nghal ṭhin. A hla phuah hi aman a sak bakah, midangin an sak sak a awm nual a, mi hla phuah sa a thluk siam sak eng emaw zat a nei bawk.

Award dawn tawh te
Mizo zaithiamten chawimawina an dawn theih chi chu C.Sanga hian a dawng kim deuh vek a, award 12 lai a dawng tawh a ni.

Chung zingah chuan Moon Light, Vulmawi, Lelte leh Ṭhazual Award-te pawh a tel. Kumin October 6 khan Ṭhazual Award sem a ni a, he hunah hian C.Sanga hian award pahnih a dawng a, 'Best Male Artist' atan thlan niin, he chawimawina hi ṭum thum lai a dawng tawh. Hei bakah hian Daduh-i nen 'Best Duo/Group Award' an dawng bawk a, award sem zan hian stage-ah a ding chhuak a, mipui hmaa a thusawi hnuhnung a ni.

Kum lama naupang zawkte zai lama kaihruaitu ṭha tak a ni a, a zaithiampuite zah pawh a kai hle a ni. Music Domain Mizoram (MDM)-ah hruaitu pawimawh tak niin, president nihna hial lo chelh tawh a ni. Kum 2015-16 khan vice president atan thlan a ni a, a kum lehah president a tan thlan zui a ni bawk. A thih ni thleng hian MDM Executive member a ni.

Zaithiam ten an ui
Kan ramah zaithiamten lawm leh duhsak an hlawh a, chung zingah chuan C.Sanga pawh hi a tel. Sulhnu tam tak a hnutchhiah a, a thawhpui leh a lo zaipui tawh ṭhin, leh a zaithiampuite chuan hetiang hian amah an ui thu an sawi :

Daduhi : Vawi eng emaw zat a lo zaipui tawh Lalrindiki Khaingte (Daduhi) chuan C.Sanga thihna chuan a ṭhawng takzet tih a sawi a, awih harsa tak a ni, a ti. Daduhi chuan, "Ka thian, ka nau duhtak, mi rilru ṭha leh hlim thei, ka va han ui tak che em. Mi hriat kan nih hma aṭanga zai dun ṭhin leh min kaihruaitu i ni a, ka album tinah hian i sulhnu a awm asin. Ka ui ngawih ngawih che. I fak ṭhin Lalpa chuan A angchhungah lo pawm mawlh che rawh se" tiin a thlah.

Liandingpuii : Kan hnam rohlu mi pakhat kan chan ta. Ani kan chan hi channa nasa tak ava ni em. Mimal tak pawhin ka tan a hlu a, guitar min perhsak mai bakah, kawng engkimah min pui nasa em em a ni. Veng khata awm ta chu min ṭawiawm ṭha em em ṭhin a, mi tlawmngai tak a ni. Mizo mipa zaithiam ber leh aw mawi ber, hlaphuah thiam ni bawk, music thiam bawk...mi uiawm tawpkhawk a ni. Zoram rimawi khawvelah hian a hming a dai tawh lo ang. A kalsan tak a nupui Mamuani leh a fapate Pathianin awmpui mawlh rawh se.

TBC-a : Awih har ka ti a, ka ui tak zet a ni. Ani ang Mizoten kan nei hi kan vannei a, engtikah mah a hming a dai tawh lo ang. A nupui fanaute Pathianin vengin awmpui malwh rawhse.

Lawmi Khiangte : "Engpawh ti dawn la bul ṭanna dik leh tawpna dik chu thinlung tlawm hi a ni..." tiin C.Sanga'n a fuih ṭhin thu a sawi. Lawmi chuan, "U Sang, kum 15 ka nihin music khawvelah min hruai lut a, Zoram mipui hmaah min dinpui a min chhawpchhuak tu, i tel lo hian kal ka lo la zir chhin ngai lo asin. Ka râwn leh ka pun ber, ka pa leh ka u nih fâwm a, vawikhat pawh min la thlah ngai lo tu! Vawi leh khatah min thlah thut mai hi a mak a ni...mangṭha ka la ti phal lo che" tiin a ui thu a sawi.

Mathlenga : Zaimi kan chan mawlh mawl a, a pawi tak zet a ni. A bik takin C.Sanga hi ka ui a, a mihring mi hrinnaah pawh mi puitling tak a ni. Kan zinho laite ka ngaihtuah a, he leiah hmuh tur a awm tawh lo tur hi awih harsa tak a ni. A kalsan tak a chhungte Lalpa'n vengin awmpui mawlh rawhse.

Rachael : Mizo Idol star Rachael Lal­nunkimi chuan, "Zai lama ka pa, kawng engkima min kaihruai ṭhintu...koh tur i awm tawh lo tur hi a na ka ti...ka ui takzet che" tiin C.Sanga a thlah.

Feli Fanai : "Ka unaupa ang maia ka en a ni a, a thi tih hi pawm a harsa takzet a ni. A nupui fanaute Pathianin vengin awmpui mawlh rawh se" tiin a thlah. Feli chuan C. Sanga chu zaimite tana mi ṭha tak, a bik takin hmeichhiate ngaihsak em em tu a nih thu a sawi a, khawi loa vah chhuah chang pawha an thlamuanpui ber pakhat a nih thu a sawi. "Hmeichhiate himna a ngai pawi­mawh em em a, a awm tawh lo tur hi a pawi takzet a ni" tiin, Mizo mipaa zaithiam a tih ber leh ngaihsan ber chanchin a sawi bawk.

Rosy K. Remsangpuii : Mizo mipa-a aw nalh ber mai, aw pa em em, music leh studio vela cheimawi chawp ngai lo, talent ṭha tak nei, zaimi diktak zinga mi a fam mai hi a runthlak ka ti. Thihna hi a nain a pawi vawng vawng a ni e. Music khawvela mi special bik a nihna hi Zofate zingah a nung reng tawh ang. I aw mawi lutuk tak mai min hnutchhiah avang hian kan lawm e. Ka ngaisang che in, ka ngaihlu in ka zah takzet a che. Thlamuang takin chawl ang che.