Khiangte Construction Ṭhazual Lengzem Chart roreltu thar Lawmi Chhakchhuak 'Ṭah ruai ka nuam'

Khiangte Construction Ṭhazual Lengzem chart thar berah ṭhangthar zaithiam, Lawmi Chhakchhuak chuan 'Ṭah ruai ka nuam' tih hla a sak hmangin chart chung berah a in hlangkai. Lawmi hi mi tam zawk chuan kan la belchiang lutuk lo mai thei, mahse a aw mil tur tak hla a sakna ngaithla tawh tan chuan a hming leh aw hi theihnghilh harsa khawpa ngaihno bei leh special a ni. He hla phuahtu hi tudang ni loin tunlai lengzem hla lar tak tak phuahtu Rpa Ralte bawk a ni a, video hi Mike (Zote Entertainment) kutchhuak niin, Youtube-ah pawh thlirtu an pung chak hle.

Zorinzuali ft G'nie leh Zaii Hauchhum an rawn lang e
JT Production phuah, Zorinzuali ft G'nie ten inkawp rem taka an sak 'Ka Saltanna' chu pasarihna aṭangin pahnihnaah a rawn invawrh chho a, hun rei tak thawm an neih loh hnuah an rawn comeback -na hla hi a mawi lehpek hle. Chart-a pathumna dinhmun hi tunlai hmeichhe lengzem hla sa zinga mi lawm hlawh leh, Mizoram hmun hrang hranga 'Homecoming Tour' hlawhtling taka nei tu, Zaii Hauchhum chuan a hla 'Hmangaihna ka hua' hmangin a rawn luah bawk.

Chart a hla lang dangte
Chart-a palinaah hian KR Robert ft Tuaisiala 'Millionaire fanu' chu rawn langin, Grace 10:45 hla thar 'Vawi sawmli leh nga' chuan top 5 a khar. Top 10-ah hian Awmtea Polymer, Sangkimi Khiangte, JOD, Manuna, Tetei LS Tochhawng-te pawh an lang a ni.