Hilary Duff-in a bialpa hlui Aaron Carter thlahna thu a sawi

Hillary Duff chuan a bialpa hlui, kum 34 mi Aaron Carter thihna chuan a ṭhawn takzet thu leh, a ui thu a sawi. Duff leh Carter-te hi kum 2001-2004 inkar khan an inzui ṭhin a, a Disney Channel series, 'Lizzie McGuire'-ah pawh khan a inlan nghe nghe. An inzui laiin Carter hian Lindsay Lohan a kawpsan nia sawi a ni. Hemi hnuah Duff chuan pasal pahnih nei tawhin, a pasal hnuhnung zawk Matthew Koma nen fa pathum an nei tawh a ni. Kum 2014 khan Carter chuan Duff-i chu "Damchhunga ka hmangaih tawh tur" tiin a tleirawl chhuah chhoa a hmangaih hmasa a nih thu a sawi.

Carter hian a hun hnuhnung lamah addiction leh mental health lamah harsatnate tawk in, kumin kumtir khan a fapa Prince enkawl theihna pawh a hloh hial. Duff chuan "Khatiang khawpa khawvel harsa i hmachhawn kha ka lainat chein, khawvel hmuhah talchhuah i tum nasat zia ka hmu a ni," tiin, "Mi hip theihna danglam tak i nei a, ka tleirawl laia ka hmangaih i ni," a ti.

Aaron-a unaupa Nick Carter pawhin social media kaltlangin a nau a ui thu a sawi. "Vawiin hian ka thinlung chu a keh sawm vek a ni. Kan unau hian inkawm tam loh mah i la, a laka ka hmangaihna erawh a dal ngai lo. Engtik niah emaw chuan nunkawng duhawm leh ṭha zawk a zawh thei tih rinna thuk tak ka nei tlat ṭhin," tiin a nau ṭhat chhuah hun a nghahhlelh ṭhin thu hi a sawi.