Assam tuilian tuarte tan Priyanka Chopra Jonas-te nupa pen chhuak

Bollywood star Priyanka Chopra Jonas chuan Assam-a tuilian tuarte ṭanpuina turin donation pe turin midangte a ngen. 

"Kan hriat ṭheuh angin khawvelah Covid-19 hri a leng mek a, he hri vanga buaina leh harsatna a awm lai mekin India-a Assam state-ah harsatna dang a thleng a, he state hian tuilian an tuar mek a ni. He tuilian vang hian Assam-a Kaziranga National Park-a nungcha tam tak chu an thi tawh bawk," tiin Priyanka chuan Assam state harsatna chu a social media kaltlangin a puang chhuak a ni. 

Priyanka chuan, "Hri len piah lamah hian tuilian vang hian Assam mite chuan harsatna an tawh belhchhah nasa hle. Chuvang chuan puih an ngai a, ṭanpui an ngai tak zet a ni. Hemi khawngah hian kei leh ka pasal Nick Jonas chuan donation kan pe a, an harsatna hriatthiam puia donation pe ve turin mimal tinte ka ngen che u," a ti. 

Assam bakah hian Priyanka chuan India-a a pianna state Bihar-a tuilian tuar mekte ṭanpui turin midangte chu a ngen bawk a, a pasal Nick nen donation an pek tawh thu leh donation pe ve turin midangte pawh a sawm nghal a ni.