Tenet tlangzarh hun thar an puang leh ta

Christopher Nolan film budget sang tak 'Tenet' tlangzarh hun tur chu a vawi lina atan tarlan a ni leh ta a, August 26 hian ram hrang hrang 70 velah tlangzarh a ni dawn a, Canada-ah chuan August 27-ah an tlangzarh ang a, United States-ah chuan September 3-ah an tlangzarh thung ang.

Tlangzarh hun hi an sawn leh hlauh a nih loh chuan Croatia, Denmark, Egypt, Estonia, Finland, In­donesia, Italy, Slovakia, Sweden, Swit­zer­land, Turkey, Ukraine leh U.K-te chu 'Tenet' en hma­sa thei ram an ni dawn a,  Kazakhstan leh Russia-ah chuan  Sep­tember 10-ah an en thei chauh dawn a, Japan-ah phei chuan a tlai lehzual dawn a ni.

Kar hmasa khan Warner Bros chuan an release calendar aṭangin 'Tenet' hi an paih hial a, tlangzarh hun pawh an puang mai dawn lo nia a lan laiin an puang leh ta a ni. Indopui III-na chhuak tur danna tura hmalatu pawl 'Tenet'-te chetvelna tur film hi $maktaduai 200–225 vel laia sen a ni a, tuna box office dinhmun nena thlir chuan an tlangzarh ngam rih lo pawh hi a awm viau. Mahse tun ang renga Box Office-a sum lengvak a tlem a nih chuan film siamtu lam tan chuan tlangzarh pawh a phurawm dawn lo a, hmasawnna a awm lo a nih chuan tlangzarh hun an sawn leh thut lo ang tih pawh a sawi theih loh.