Rapper Rdi leh a ṭhiante'n hla thar an 'drop' dawn

Mizo hmeichhe rapper Rdi 'Ladylicious' leh a ṭhiante chuan hla thar  'DROPBOXX CYPHER' an tichhuak dawn.

Rdi-te ṭhianho hming hi 'Dropboxx' tih a ni a, rap music tuipuitute'n an hmelhriat tur tak tak hmel kan hmu nual dawn. Mizo rap music huangchhunga tawnhriat ngah tawh, 'rap battle' velah pawh an hmel kan hmuh fo tawhte an ni hlawm dawn a, chung zingah chuan The Pit stage battle-a tel ṭhin pawl hrang anga kal Sirap, KhanDynasty leh Chhimthli lamte pawh an inlan dawn. Mahse tun ṭumah hi chuan an thawk ho dawn thung a ni.

Line-up aṭang ringawt pawh hian hip hop music tuipuitute tan chuan a nghahhlelhawm hle ang. Johana beat siam hmangin Mizo mipuite min awi dawn a, khaw hran hrana studio hran hrana an record a nihna hian a tihlu zual hle dawn. Siaha lam aṭang­in StephenHaster leh JeKhan-te rap kan ngaithla dawn a, Lawng­tlai lam aṭangin MicKhan leh Sickid an inlan dawn bawk. Lunglei lam aṭangin Murfelo leh ApuiaHnamte, AP tia kan hriat ṭhin an tel dawn a, Aizawl lam aṭangin Rdi aka Ladylicious, Laree­ferRose leh Sangtea aka Rafada-te an tel bawk ang.

Heng mite hian khaw hrang hrangah record an ti a, hei hi JT Production chuan final mixing a lo tihsak thung a ni. Recording chauh hi khaw hrang hrangah an ti lo a, video pawh khaw hrang hrangah an shoot a, chu chu Volts and Volume DoubleV-in an lo rem­khawm leh a, lyric video leh video pangngai inpawlh a ni nawk dawn. Rdi chuan karleh lamah hian Double V YouTube channel-ah tichhuah a nih hman a rin thu sawiin, a thawhpuite an thiam avangin a huphurhin a nghakhlel bawk tih a sawi.