Mizo show ropui Ṭhazual Award-a zai tur a hriat ta
Zonet Cable TV buatsaih music award ngaihhlut hlawh, Ṭhazual Award vawi 8-na chu November 10-11, 2022 hian Dawrpui Multipurpose Centre-ah neih a ni dawn. Ṭhazual Award hi zaithiam chawimawina ni ringawt loin show ropui bik a ni a, Mizo zaithiam vanglai chen mek chinte chu an inlan kim leh hle ang.
En theihna
Ṭhazual Award hi Gospel leh Lengzemah ṭhenhran a ni a, November 10-ah Gospel hun hman a ni ang a, November 11-ah Lengzem hun hman leh a ni ang. Zonet Cable TV pawt tan Zawlbuk-ah a en theih dawn a, online kaltlanga en duh tan Zonet Empai hmangin a en theih dawn bawk.
Show ṭan hma thil thleng pawh live-a tihchhuah a ni dawn a, 'Red Carpet' bik hi dar 7:00 aṭangin Zonet YouTube-ah a en theih ang.
Idol Jerry leh zaithiam dang 9
Gospel leh Lengzem bikah zaithiam 10 ve ve an zai dawn. Mizo Idol 2022 pahnihna C. Vanlalroluahtumi (VLi) leh top 5-a lang pha Angaihi te an tel dawn.
Zai tur dang hi Mizo Idol ni tawh Jerry Lalrinawma bakah Jonathan Lianhna, Zorema Khiangte, PC Vanlalhriati, Lalthansangi, Isaac Hnamte, Zoramchhani Band leh Nghaktea Fanai an ni.
Idol Hmangaihi, K. Hminga etc
Lengzem lam pawh a ṭha rual tho an ni. Mizo Idol 2022 Hmangaihi leh pathumna David Darlong te ang thoin zai tur dang pawh mi nawlpuiin an hla an zawm thei vek te an ni.
YouTube aṭanga rawn lar chhuak Guru Gee pawh a tel, Guru Gee hla 'Nang ngei i ni' tih phei chu tleirawl zingah hre lo an awm mawlh lo.
Zai tur dang K. Hminga, Siampuii Ralte, Vanlalhmangaiha, Saiwanah & Henz, IVYZ (Mizo Girl Group), Michelle Varte leh Mizo Idol 2022 aṭanga kan hriat Deborah Ralte te hi an chanchin a hranpa thui taka ziah theih vek a ni.
Designer-te ngaihhlut Ṭhazual Award
Ṭhazual Award-a inlante hi Mizo designer larten an thawmhnaw hak tur hi an ṭhui sak a, hei hian show hlutna pawh nasa takin a tihsan phah.
Mizo designer Buanga Chhangte chuan zaithiam Jonathan, Jerry, Nghaktea, Joseph Hauzel, Guru Gee, Henry Varte, Andrew, PC Hriati bakah model lar Nunui Rualleng leh film star Papuia te kawr hak tur a ṭhuisak.
Buanga Chhangte chuan, "Ṭhazual Award hi Mizorama kan show neih hlut ber ang a ni a, fashion zawnga thlir chuan mipui en hlawh ber a ni. A hranpaa show te kan neih theih loh avangin Ṭhazual Award hi winter show atan ka hmang ang," tiin Vanglaini a hrilh.
Ṭhazual Award-ah hian zaithiam Rebecca Lallawmsangi leh Tenui bakah model hoin Designer Tluangpuii Hmar kut chhuak an ha thung ang. Tluangpuii Hmar dawr hi Chanmari biak in bulah a awm a, fashion academy changtlung tak a nei bawk.
Tluangpuii Hmar chuan, "Entertainment hrim hrimah chuan Ṭhazual Award aia show ṭha hi kan nei lo. Duhthu han sam ta ila, Ṭhazual Award-ah hian zaithiam leh model chauh ni loin infiammi leh lehkhathiam sang tan hmun siam sak ni se. Tun ai hian a hlu lehzual ang," tiin Vanglaini a hrilh.