Taylor Swift album 'Reputation' hralh a kal

Taylor Swift album thar 'Reputation' chu kar kalta Zirtawpni khan tlangzarh a ni a, hralh a kal rem rem hle.

'Reputation' hi tlang­zarh a nih aṭanga darkar 24 lek chhungin copy 700,000 hralh chhuah a ni. Hei hi US-ah bik chauh a la ni leh nghal a, khawvel hmun danga hralhte nen chuan chhiar tham fe a nih nghei ang le. Album hi Big Machine Records kaltlanga tlangzarh a ni.

Swift album thar hi kar khat chhungin copy maktaduai khat vel hralh chhuah hman beisei a ni a, record a rawn siam leh a nih pawhin a mak lo ang. Kum 2014 khan '1989' a tichhuak a, kar khat lek chhungin copy maktaduai 1.29 zet hralh a ni. Hei hi a rawn khum thei ang em tih chu hun rei loteah hriat thuai dawn. Swift hian kar khar chhunga copy maktaduai chaung hralh chhuah theih hi album pathum a lo nei tawh a, 'Reputation' hi a palina a nih theih ngei a beisei awm hle. Kum 2012-a a tihchhuah Red kha kar khat chhungin maktaduai 1.21 hralh a ni a, Speak Now pawh maktaduai 1.05 hralh a lo ni tawh bawk.

Hei mai hi a la ni lo 'Reputa­tion' hi kumina album tihchhuah tawh zinga hralh ṭhat ber anih an ring a, Ed Sheeran album 'Divide' chu a rawn khum theih an ring. Twitter lamah pawh a lar nghal vet vet hle a, darkar 24 lek chhungin tweet maktaduai 1.5 chuang a awm hman.

Hetih lai hian 'Reputation' hi tlangzarh a nih hmain a leak out an ti a, Swift-i fan-te an thinrim hle. Tlangzarh a nih hma lawkin a hla ṭhenkhat chu putru niin an sawi a, internet lamah a link a darh niin an sawi. Swift-i fan-te chuan he thil hi an pawmzam mai thei lo a, an lungawi lo hle a ni. A fan pakhat chuan, "A hla ngaina tak taktu tan chuan a leak out hi lo ngaithlak a rem lo, chumi tithei lo chuan Switf-i an phatsan a ni" tiin, Switf-i thlavang a hauh na hle.

'Reputation' album hi tlangzarh a nih hma hauhin order 400,000 chuang a awm sa hrim hrim a, tlangzarh kara hralh zat pawhi hi maktaduai 2 a tlin hial an ring. A album-ah hian hla 14 a awm a, heng zinga pali hi chu a tihlar nan tlangzarh a lo ni tawh. Ready For It, Look What You Made Me Do, Gorgeous leh Call It What You Want te chu Billboard Hot 100-a pakhatna hauh thei vek an ni. Hetih lai hian New Year's Day pawh album tlangzarh hma ni lawkah release a ni a, a hit viau bawk.

Taylor Swift hian kum thum zet a vei hnuah album a ti­chhuak leh chauh a, a tihchhuah hnuhnung ber chu '1989' album kha a ni. 'Reputation' hi a album parukna a ni bawk.