Joy-a thlah liam a ni ta

Zaithiam lâr leh telivision show hrang hranga inlan ṭhin Joy Zairemmawia chu nimin khan amah uitu mi ṭhahnem takin an thlah liam ta.

Joy Zairemmawia (46) s/o Vanlalhliapi, Ramhlun Sports Complex veng hi taksaa ṭhat lohna hrang hrang avangin November 8, Thawhlehni zan dar 11:45 khan a thi a, lumen a nih hnuah nimin chhun dar 12 khan an chênna inah vui a ni.

Unau panga zinga upa ber Joy-a hi December 19, 1976 khan Darlawnah a piang a, zaithiam lar Joseph Zaihmingthanga ú chiah a ni. Kum 1994 aṭangin Ramhlun Sport Complex-ah an awm ṭan a, kum 1998 khan Lalrempuii nen inneiin, fapa pali an nei.

Joy-a hi zaithiam tak a ni a, AIR, Aizawl Station-ah B grade artist a ni a, LPS Vision buatsaih Youth Icon 2007-ah pahnihna a ni. Zai lamah inhmang zui zelin, music video pawh a nei nual nghe nghe. LPS Vision-ah a thawk zui a, TV programme buaipuiin, programme chi hrang hrang eng emaw zat a 'host' ṭhin a ni.

Kum 1996-a Ramhlun Sports Complex kohhran a din ṭan aṭangin rawngbawlna chanvo pawimawh tak tak a chelh ṭhin a, pastor bial zaipawl conductor a nih ṭhin bakah, KṬP branch leh bialah hruaitu hlunte zinga mi a ni. YMA-ah te, Sporting Club-ah te, Mizoram Futsal Association-ah te, Mizo Zaimi Inzawmkhawmahte inhmangin hruaitu a ni ṭhin bawk.

Joy-a hian mîtliam natna a nei a, November 6, 2022 aṭangin a tho harh peih lo a, November 8 zing dar 1-ah LRM Hospital-ah dah luh niin, ICU-ah enkawl nghal a ni. November 8 vêk zan dar 11:45-ah a khawvel zinkawng a zawh tàwp ta a; mi hlim thei tak Joy-a avangin mi tam tak mittui a tla a ni.