Nazareth singer Dan McCafferty a thi

Scottish hard rock legend, Nazareth dintu zinga mi, Dan McCafferty chu Thawhlehni khan kum 76 mi niin a thi. Dunfermline, Scotland-a piang, Dan hi kum 1968 aṭanga 2014 inkar khan Nazareth band lead singer a ni ṭhin a, a aw pa tak leh danglam tak avangin mite ngainat a hlawh hle a, Broken Down Angel, Hair Of The Dog leh Love Hurts-te phei chu an larpui ṭhin hle.

Kum 2014 thleng khan band-ah hian awmin, chuap lam fel lo, chronic obstructive pulmonary disease a neih avangin thawk lamah harsatna a nei ṭhin a, a taksa a lo chak tawk tawh lo nen, loh theih lohin zai a chawlhsan phah ta a ni. "Tour laia ka zai ang khan ka zai thei tawh lo. Duh anga kan zai theih loh chuan band chhuahsan mai kha ṭha in ka hre ta a ni. Ka lungngaia, mahse, live chuan ka zai thei meuh tawh si lo," tiin Classic Rock-in an kawm ṭumah a sawi.

Nazareth hi kum 1968 khan an din a, an core member - McCafferty, Agnew, Manny Charlton (guitar) leh Darrell Sweet (drums)-te chuan an cover band 'The Shadettes' tih hmingin 1960's khan Dunfermline-ah suit eng thuam inang ṭhap ha chungin an perform ṭhin.

Hrisel lo hle mah se, studio lam a luhchilh reng tho a, kum 2019 khan Dan chuan a solo album hnuhnung ber 'Last Testament' chu a tichhuak.

Nazareth bassist, Pete Agnew chuan "Thuchhuah ka siam azawnga la lungchhiat thlak ber a ni," tiin Instagram-ah a sawi a, a thih chhan tak erawh tarlan a ni lo.